Azərbaycan bu ilin iyul ayında Dayanıqlı İnkişaf Məqsədlərinə (DİM) nail olmaq üzrə dördüncü könüllü milli hesabatını təqdim edəcək dünyada azsaylı ölkələrdən biridir.
“Report” xəbər verir ki, bunu BMT-nin Azərbaycandakı rezident əlaqələndiricisi Vladanka Andreeva Bakıda “Azərbaycanın 4-cü Könüllü Milli Hesabatına dair maraqlı tərəflərlə məsləhətləşmələr, Qadınların iqtisadi hüquq və imkanlarının genişləndirilməsi və 5-ci DİM üzrə irəliləyiş” mövzusunda keçirilən 4-cü Dayanıqlı İnkişaf Məqsədləri (DİM) Dialoqunda çıxışı zamanı deyib.
Onun sözlərinə görə, bu fakt Azərbaycan hökumətinin öz məqsədlərinə çatmaq üçün öhdəliklərinə ciddi yanaşmasından xəbər verir: “DİM-in gündəliyi Azərbaycanda həqiqətən də dərin kök salıb”.
V.Andreeva həmçinin Bakıda 4-cü DİM dialoqunun təşkilinin vacibliyini qeyd edib: “Dialoq Azərbaycanın 4-cü Könüllü Milli Hesabat layihəsi üzrə milli tərəfdaşlar və maraqlı tərəflərlə məsləhətləşmələr üçün platforma rolunu oynayır”.