Azərbaycanda sənaye istehsalı yanvar-fevral aylarında 2,3% artıb

Bakı. 13 mart. REPORT.AZ/ Cari ilin yanvar-fevral aylarında Azərbaycanda sənaye müəssisələri və bu sahədə fəaliyyət göstərən fiziki səxslər tərəfindən 3,7 mlrd. manatlıq və ya ötən ilin müvafiq dövrü ilə müqayisədə 2,3% çox sənaye məhsulu istehsal olunub.

“Report” Dövlət Statistika Komitəsinə istinadən məlumat verir ki, mədənçıxarma bölməsində məhsul istehsalı 5,4%, o cümlədən neft hasilatı 1,6%, əmtəəlik qaz hasilatı isə 10,5% artıb. Sənaye məhsulunun 59,9%-i mədənçıxarma bölməsində, 29,2%-i emal bölməsində, 9,9%-i elektrik enerjisi, qaz və buxar istehsalı, bölüşdürülməsi və təchizatı bölməsində, 1,0%-i isə su təchizatı, tullantıların təmizlənməsi və emalı bölməsində istehsal olunub. İki ay ərzində sənayenin emal bölməsinin məhsullarından içki istehsalı 1,5%, kimya sənayesi məhsulları istehsalı 20,6%, rezin və plastmas məmulatların istehsalı 29,3%, hazır metal məmulatların istehsalı 7,6%, tikinti materialları istehsalı 24,0%, elektrik avadanlıqlarının istehsalı 73,6% artıb.

Elektrik enerjisi, qaz və buxar istehsalı, bölüşdürülməsi və təchizatı bölməsində məhsul istehsalı 2,3%, elektrik enerjisi istehsalı isə 1,2% artaraq 4,1 mlrd. kVt saat olub. Su təchizatı, tullantıların təmizlənməsi və emalı bölməsində məhsul istehsalı 10,0% artıb. İki ay ərzində istehsal olunmus məhsulun 99,7%-i istehlakçılara göndərilib. Bununla yanaşı, əvvəlki dövrlərdə yaranmış ehtiyatlar da nəzərə alınmaqla sənaye müəssisələrinin anbarlarında 312,8 mln. manatlıq hazır məhsul olub və əvvəlki ayla müqayisədə 21,1 milyon manat artıb.