Bakı. 28 may. REPORT.AZ/ Hazırda Rusiyada mövcud idarəçilik sistemi ilə ciddi, genişmiqyaslı islahatlara başlamaq təhlükəlidir. İslahatlardan öncə ilk öncə ölkədə effektiv idarəetmə sistemi yaradılmalıdır. "Report" xəbər verir ki, bunu "Vedomosti" qəzetinə müsahibəsində "Sberbank" ASC-nin prezidenti German Qref bildirib.
"Nə qədər pul azalırsa, bir o qədər islahatlara ehtiyac duyulur. Neftin qiymətinin 70 dollar/barel səviyyəsində olması şəraitində isə buna ehtiyac yoxdur. Hazırkı vəziyyətdə ciddi islahatlara başlamaq təhlükəlidir", - G.Qref qeyd edib.
İqtisadi situasiyaya da toxunan Qref mənfi trenddən çıxmaq üçün heç bir mənbə görmədiyini bildirib. Onun sözlərinə görə, 2015-2016-cı illər ümumilikdə iqtisadiyyat və bank sektoru üçün çətin dövr olacaq. Sabiq nazir həmin illərdə ÜDM-in azalmasının 3-4% olacağının önəmi olmadığını, əsas problemin ölkənin üzunmüddətli mənfi trendə daxil olduğunu qeyd edib. Belə ki, aprel ayında Rusiyada pərakəndə satış illik müqayisədə 9,8%, investisiyalar 4,8%, sənaye 4,5% və ÜDM 4% azalıb. Büdcə kəsiri isə ÜDM-in 4,4%-nə çatıb. Bank sektoru üzrə yekun mənfəət yenidən mənfiyə keçib.
Daha sonra G.Qref ölkəsinin çıxışı olmayan dalana girmədiyini, sadəcə, yavaş-yavaş zəifləyəcəyini bildirib. "Sberbank"ın prezidenti hesab edir ki, Rusiyada gələcək iqtisadi inkişafı təmin etmək üçün insan resursları, yeni texnologiyalar, sistem əhəmiyyətli institutlara investisiya yatırılmalı, ölkədə ümumi investisiya mühiti yaxşılaşdırılmalıdır.