ABŞ ilə İsrail İran və Rəfahda planlaşdırılan əməliyyatla bağlı məsləhətləşmələr aparıb

ABŞ ilə İsrail rəsmiləri İranın zərbəsi və yəhudi dövlətinin Qəzza zolağının cənubundakı Fələstinin Rəfah şəhərində planlaşdırdığı quru əməliyyatı ilə bağlı məsləhətləşmələr aparıblar.

"Report"un məlumatına görə, bu barədə Ağ Evin mətbuat xidmətinin yaydığı xəbərdə deyilir.

Sənəddə qeyd olunur ki, məsləhətləşmələrdə Amerika tərəfdən ABŞ Prezidentinin milli təhlükəsizlik üzrə köməkçisi Ceyk Sallivan, İsrail tərəfini isə strateji planlaşdırma naziri Ron Dermer və ölkənin Milli Təhlükəsizlik Şurasının rəhbəri Çaxi Xaneqbi təmsil edib.

Onlar “İranın hücumu və İsrailin müdafiəsini daha da gücləndirmək üçün birgə səyləri” müzakirə ediblər. Sullivan həmçinin yəhudi dövlət rəsmilərini İrana qarşı tətbiq edilən yeni sanksiyalar barədə məlumatlandırıb.

Bundan əlavə, Rəfah ətrafında vəziyyətlə bağlı geniş tərkibdə məsləhətləşmələr aparılıb. “Tərəflər Rafahda radikal Fələstinin HƏMAS hərəkatını məğlub etmək üçün ümumi məqsəd barədə razılığa gəliblər”, - sənəddə qeyd edilir. Eyni zamanda, Birləşmiş Ştatlar Rəfahdə müxtəlif fəaliyyət ssenariləri ilə bağlı narahatlığını ifadə edib və İsrail nümayəndələri bu mülahizələri nəzərə almağa, ekspertlər səviyyəsində əlavə məsləhətləşmələr aparmağa razılaşıblar. Sənəddə qeyd edilir ki, bu təmaslar tezliklə baş tuta bilər.