Xarici işlər nazirinin müavini Ramiz Həsənov Vyetnam Sosialist Respublikasına səfər edib

Xarici işlər nazirinin müavini Ramiz Həsənov Vyetnam Sosialist Respublikasına səfər edib.

Xarici İşlər Nazirliyinin mətbuat xidmətindən "Report"a verilən məlumata görə, Hanoy şəhərində Azərbaycan Respublikası və Vyetnam Sosialist Respublikasının Xarici İşlər nazirlikləri arasında siyasi məsləhətləşmələr keçirilib. Azərbaycan nümayəndə heyətinə xarici işlər nazirinin müavini Ramiz Həsənov, Vyetnam nümayəndə heyətinə isə xarici işlər nazirinin birinci müavini Bui Thanh Son rəhbərlik ediblər.

Danışıqlar zamanı tərəflər iki ölkə arasında münasibətlərin mövcud vəziyyətini nəzərdən keçirərək əməkdaşlığın bütün sahələr üzrə təşviqinə dair geniş fikir mübadiləsi aparıblar. Müzakirələr əsnasında həmçinin tərəflər hazırki siyasi məsləhətləşmələrin məhz Azərbaycan Respublikası diplomatik xidmət orqanlarının 100 illik yubileyinin keçirilməsi ərəfəsində təşkil olunmasının əhəmiyyətini xüsusi vurğulayıblar.

Vyetnama səfəri çərçivəsində R.Həsənov eyni zamanda bu ölkənin rəsmiləri ilə ikitərəfli görüşlər keçirib.

Xarici işlər nazirinin müavini Azərbaycan-Vyetnam Hökumətlərarası Komissiyasının Vyetnam tərəfindən həmsədri, sənaye və ticarət naziri Tran Tuan Anh ilə görüşüb. Görüşdə tərəflər münasibətlərin bütün spektri üzrə əməkdaşlığın mövcud vəziyyətini müzakirə edərək, çoxşahəli əlaqələrin genişləndirilməsinə dair fikirləri bölüşüblər. Həmçinin tərəflər Azərbaycan-Vyetnam Hökumətlərarası Komissiyası çərçivəsində keçirilən son iki görüşdə əldə olunan razılaşmaların həyata keçirilməsi üçün atılması zəruri hesab olunan əməli addımlar ətrafında fikir mübadiləsi aparıblar.

Xarici işlər nazirinin müavini R.Həsənovun həmçinin Vyetnam Sosialist Respublikası Milli Assambleyasının sədr müavini Uong Chu Luu ilə görüşü keçirilib. Görüşdə tərəflər parlamentlərarası əməkdaşlığın inkişaf etdirilməsi yolları, habelə Dostluq Qrupları arasında mövcud əlaqələrin genişləndirilməsi istiqamətində fikir mübadiləsi aparılıb.

Azərbaycan Respublikası diplomatik xidmət orqanlarının 100 illik yubileyi münasibətilə Hanoy şəhərində Azərbaycan Respublikasının Vyetnam Sosialist Respublikasındakı Səfirliyi və Vyetnam Xarici İşlər Nazirliyinin Diplomatik Akademiyasının birgə təşkilatçılığı ilə “Azərbaycan və Vyetnam diplomatiyası: Paralellər, inkişaf, dövlət quruculuğunda rolu” mövzusunda konfrans keçirilib.

Konfransda Vyetnam Kommunist Partiyası, bu ölkənin Prezident Administrasiyası, Milli Assambleyası (Parlament), Hökuməti, Vyetnam Xarici İşlər Nazirliyi, müxtəlif dövlət və özəl qurumları, Vyetnam-Azərbaycan Dostluq Assosiasiyası, Azərbaycanın Mədəniyyəti və Tarixi Araşdırmaları Mərkəzi, ali təhsil ocaqları, beyin mərkəzləri, diplomatik korpus və kütləvi informasiya vasitələrinin nümayəndələri, Vyetnam Diplomatik Akademiyasının rəhbərliyi və tələbə-müəllim heyəti, habelə Azərbaycan təhsil ocaqlarının vyetnamlı məzunları iştirak ediblər.