Xarici işlər naziri: "Ukrayna və Azərbaycan arasında qarşılıqlı dəstək və anlaşma var" - EKSKLÜZİV

Kiyev. 10 aprel. REPORT.AZ/ "GUAM ölkələri arasında ticarətin sadələşdirilməsi barədə saziş həyata keçirilməyə başalayanda bu, iştirakçı ölkələrin təhlükəsizliyi və rifahı üçün əsas amil olacaq".

Bunu "Report"un Ukrayna bürosuna Ukraynanın xarici işlər naziri Pavel Klimkin deyib.

"Bizim böyük potensialımız var, lakin hələ ondan tam istifadə edə bilmirik. İlin sonuna qədər GUAM ölkələri arasında imzalanmış sazişləri həyata keçirə bilsək, potensialdan istifadə edə bilərik", - deyə P.Klimkin bildirib.

Ukrayna xarici işlər nazirinin sözlərinə görə, GUAM üzvü olan ölkələr gömrük sistemində ümumi prinsiplər, prosedurlar və qaydalara can atmalıdır: "Təbii ki, Avropa qanunlarına istiqamət almalıyıq. Aprelin 12-də Varşavada "Vışeqrad qrupu" və "Şərq Tərəfdaşlığı" ölkələri arasında keçirəcəyimiz görüşdə də bu məsələ müzakirələrin bir hissəsi olacaq".

"Ukrayna və Azərbaycan arasında həmişə xüsusi əlaqələr olub. Bu, yalnız siyasi əlaqələr deyil, həm də dostcasına insani münasibətlərdir. Təhlükəsizlik sahəsində əməkdaşlıq haqqında danışsaq, biz, həqiqətən, bir-birimizi gözəl başa düşürük. Hər iki ölkənin ərazisi işğal altındadır, bir-birinin ərazi bütövlüyünü dəstəkləyir. Ukrayna və Azərbaycan arasında qarşılıqlı dəstək və anlaşma var", - P.Klimkin vurğulayıb.