Yuxarı

Səfirlik: Yaponiya və Azərbaycan arasında münasibətlər davamlı şəkildə inkişaf edir

Bakıda Dənizkənarı Milli Parkda qinqko yapon ağacının əkilməsi mərasimi təşkil edilib

Bakı. 11 avqust. REPORT.AZ/ "Yaponiya və Azərbaycan arasında münasibətlər davamlı şəkildə müsbətə doğru inkişaf edir".

"Report" xəbər verir ki, bunu Yaponiyanın Azərbaycandakı səfirliyinin birinci katibi Qinqa Kobayaşi Bakıda Dənizkənarı Milli Parkda Tokionun rəmzi olan "qinqko" yapon ağacının əkilməsi mərasimində deyib.

"Hesab edirəm ki, bu ağacəkmə ölkələrimiz arasında müsbət əlaqələrin daha bir nümunəsidir", - deyə Q.Kobayashi bildirib.

Dənizkənarı Milli Parkın rəis müavini Nizami Məcidov belə bir təcrübənin artıq mövcud olduğunu qeyd edib: "Bizdə bulvarda ölkə xaricindən gətirilmiş baobab ağacları əkilib".

Onun sözlərinə görə, bulvarda "qinqko" yapon ağacının əkilməsi Yaponiya ilə yaxşı münasibətlərin rəmzidir.

Təhsil Nazirliyinin Tərbiyə və məktəbdənkənar müəssisələrlə iş şöbəsinin müdir müavini Vasif Məmmədov deyib ki, Azərbaycan dövlətinin bugünkü məqsədi yeni nəsil formalaşdırmaq və onları digər mədəniyyətlərlə, o cümlədən yapon mədəniyyəti ilə yaxından tanış etməkdir.

"Vəzifəmiz gənc nəsli maarifləndirməkdir", - deyə o vurğulayıb.

Qeyd edək ki, bu gün Bakıda Dənizkənarı Milli Parkda Bakı Avropa Liseyinin şagirdləri, "ADA" Universitetinin tələbələri, Yaponiya səfirliyi, Təhsil və Xarici İşlər nazirliklərinin əməkdaşlarının iştirakı ilə "qinqko" yapon ağacının əkilməsi mərasimi keçirilib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi