Səfir: "Azərbaycanla Aİ arasında aviasiya sazişi ilə bağlı danışıqlar intensivləşib"

Bakı. 3 noyabr. REPORT.AZ/ "Avropa İttifaqı (Aİ) və Azərbaycan vahid aviasiya məkanı barədə sazişin prinsiplərinin böyük hissəsini razılaşdırıb."

"Report" xəbər verir ki, bu barədə Avropa İttifaqının Azərbaycandakı nümayəndəliyinin rəhbəri, səfir Kestutis Yankauskas bildirib.

"Mütəxəssislərimiz ötən həftə görüşüblər. İntensiv danışıqların aparıldığı tam iki gündən sonra artıq həll edilməli olan bir neçə məsələ qalıb. Bu yaxınlarda Xarici İşlər Nazirliyi ilə, ekspertlərlə danışmışam, "Şərq Tərəfdaşlığı" sammitindən əvvəl daha bir videokonfrans və ya görüş keçirilməsi planlaşdırılır. Ümid edirəm ki, bu görüşdə saziş üzrə tam razılıq əldə olunar", - Aİ səfiri qeyd edib.

O, keçən illə müqayisədə bu il danışıqların intensivləşdiyini vurğulayıb.

Azərbaycan və Aİ arasında yeni saziş üzrə danışıqların gedişini şərh edən K.Yankauskas bildirib: "Danışıqlar intensiv şəkildə aparılır. Gələn həftə daha bir videokonfrans olacağı gözlənilir. Azərbaycan nümayəndə heyətinin Brüsselə səfər etməsi üçün tarixi dəqiqləşdirəcəyik. Bunun tezliklə baş verəcəyinə ümid edirəm".