Yuxarı
    Bağlamaq

    MDB ölkələrinin Düşənbə Forumunda separatçı Dağlıq Qarabağın təmsilçilik cəhdinə görə Ermənistana xəbərdarlıq olunub

    Forumda Dağlıq Qarabağın Azərbaycan ərazisi olması xatırladılıb və separatçı rejimin təqdimatı yığışdırılıb

    Bakı. 1 may. REPORT.AZ/ Müstəqil Dövlətlər Birliyində (MDB) bu ilin əvvəlindən elan olunan “Ailə ili” ilə əlaqədar Tacikistan paytaxtı Düşənbədə “Ailə ocağı” adlı Forum keçirilib. Foruma Azərbaycan, Rusiya, Qırğızıstan, Belarus, Moldova, Ukrayna, Tacikistan və Ermənistan nümayəndə heyətləri qatılıb. 

    Yeni Azərbaycan Partiyası Gəncə şəhər təşkilatından "Report"a verilən məlumata görə, forumda Azərbaycan Milli Məclisin deputatı, partiya şəhər təşkilatının sədri Naqif Həmzəyevin rəhbərlik etdiyi nümayəndə heyəti ilə təmsil olunub.

    Forumda “Azərbaycan Respublikasında gənclər siyasəti” mövzusu ilə çıxış N.Həmzəyev Prezident İlham Əliyevin rəhbərliyi ilə ölkədə həyata keçirilən uğurlu gənclər siyasəti, görülən işlərin nəticəsi barədə məlumat verib.

    Forumda Azərbaycanın ev sahibliyi etdiyi bütün beynəlxalq tədbirlərin təqdimatı olub. Həmçinin MDB məkanında fəaliyyət göstərən gənclər təşkilatları, assosiasiyaları arasında tərəfdaşlıq və əməkdaşlığın inkişafına dair məsələlərə baxılıb, ailə quruculuğunda vətəndaş təşəbbüslərinin dəstəklənməsindən bəhs olunub, demoqrafiya siyasəti nəzərdən keçirilib. 

    Forumda Ermənistan nümayəndə heyəti tərəfindən təxribata əl atılıb, nümayəndə heyətləri arasında narazılıq yaranıb və nəticədə Ermənistana rəsmi xəbərdarlıq edilib. Belə ki, Ermənistan nümayəndə heyəti Azərbaycanın Dağlıq Qarabağ adından gənclər təşkilatlarını separatçı rejim olan “respublika” adından təqdim ediblər. Azərbaycan nümayəndə heyəti buna etiraz edib. Dağlıq Qarabağın Azərbaycan ərazisi olması xatırladılıb və bu təmsilçiliyin forumdan dərhal yığışdırılması tələb olunub. Separatçı rejimin təqdimatı forumdan yığışdırılıb və ermənilərə xəbərdarlıq edilib.

    Forum çərçivəsində Azərbaycanın mədəniyyət gecəsi keçirilib. Azərbaycan mədəniyyətinə, tarixinə, milli mətbəxinə, geyimlərinə, musiqisinə dair məlumatlar təqdim edilib.

    Sonda Azərbaycan nümayəndə heyətinə Forumda fəal iştirakına görə təşəkkür elan edilib.

    Səfər çərçivəsində N. Həmzəyev Azərbaycan Respublikasının Tacikistan Respublikasındakı səfirliyində olub. Səfirliyin əməkdaşları ilə nümayəndə heyəti səfirliyin ərazisində ucaldılmış ulu öndər Heydər Əliyevin büstü önünə gül dəstələri qoyublar. Səfir Abbasəli Həsənovla N. Həmzəyevin görüşü olub. Görüş zamanı Düşənbədə dahi şair Nizami Gəncəvinin abidəsinin qoyulması, görkəmli mütəfəkkirin adına Mərkəzin yaradılması təklifi də irəli sürülüb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi