Yuxarı

​Slovakiya Azərbaycanın ərazi bütövlüyünə hörmət edir

İki ölkə arasında diplomatik təmsilçiliklərin təsis olunmasına dair razılıq əldə edilib

Bakı. 26 yanvar. REPORT.AZ/ Azərbaycan xarici işlər naziri Elmar Məmmədyarov Slovakiya Respublikasına rəsmi səfəri çərçivəsində bu ölkənin baş nazirinin müavini, xarici və Avropa işləri naziri Miroslav Layçakla görüşüb.

Azərbaycan XİN-dən "Report"a verilən məlumata görə, M.Layçak iki dost ölkə arasında münasibətlərin intensiv və praqmatik xətt üzrə inkişaf etdiyini qeyd edərək, iqtisadiyyat, enerji, kənd-təsərrüfatı və turizm sahəsində əməkdaşlığın inkişafı üçün əlverişli imkanların olduğunu vurğulayıb.

E.Məmmədyarov iki ölkə arasında əlaqələrin inkişaf səviyyəsinin məmnunluq doğurduğunu diqqətə çatdırıb. O əlavə edib ki, əməkdaşlığın daha da inkişaf etdirilməsi üçün ikitərəfli müqavilə-hüquq bazasının genişləndirilməsinə, xüsusilə investisiyaların qarşılıqlı qorunması və ikiqat vergitutmanın aradan qaldırılması üzrə sazişlərin imzalanmasına ehtiyac var.

Slovakiyanın enerji tranzitində əlverişli mövqeyə malik olduğunu deyən E.Məmmədyarov bu sahədə iki ölkə arasında əməkdaşlıq üçün geniş imkanların olduğunu deyib.

M.Layçak E.Məmmədyarovu bu ilin may ayında Bratislavada keçiriləcək Vişeqrad qrupu və Şərq Tərəfdaşlığı ölkələrinin xarici işlər nazirlərinin birgə iclasında iştirak etməyə dəvət edib.

Ermənistan-Azərbaycan münaqişəsinin həlli üzrə danışıqlar prosesi haqqında məlumat verən N.Elmar Məmmədyarov bildirib ki, münaqişənin həlli üçün ilk növbədə Ermənistanın silahlı qüvvələri işğal olunmuş Azərbaycan ərazilərindən çıxarılmalı və Azərbaycan Respublikasının ərazi bütövlüyü və suverenliyi təmin olunmalıdır.

M.Layçak regionun sabitliyi və regiondakı münaqişələrin sülh yolu ilə həllinə dəstəklərini ifadə edərək, beynəlxalq səviyyədə tanınmış sərhədləri daxilində Azərbaycanın ərazi bütövlüyünə hörmət etdiklərini və Minsk qrupu formatı çərçivəsində münaqişənin həllini dəstəklədiklərini bildirib.

Görüş əsnasında iki ölkə arasında beynəlxalq təşkilatlar çərçivəsində uğurlu əməkdaşlıq qeyd olunub və qarşılıqlı şəkildə diplomatik təmsilçiliklərin təsis olunmasına dair razılıq əldə edilib.

Görüşdən sonra hər iki nazir tərəfindən birgə mətbuat konfransı keçirilib.  

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi