Yuxarı

Elmar Məmmədyarov Ceyms Appaturayı qəbul edib

Nazir Dağlıq Qarabağ münaqişənin həllinə nail olmaq üçün Ermənistan qoşunlarının işğal olunmuş ərazilərindən çıxarılmalı olduğunu deyib

Bakı. 16 fevral. REPORT.AZ/ Azərbaycanın xarici işlər naziri Elmar Məmmədyarov NATO baş katibinin Cənubi Qafqaz və Mərkəzi Asiya üzrə xüsusi nümayəndəsi Ceyms Appaturayı qəbul edib.

Azərbaycan XİN-dən "Report"a verilən məlumata görə, görüşdə Azərbaycan və NATO arasında əlaqələrin hazırkı vəziyyəti və perspektivləri ətrafında fikir mübadiləsi aparılıb.

NATO ilə Azərbaycan arasında əlaqələri yüksək qiymətləndirən C.Appaturay uğurlu əməkdaşlığa, xüsusilə Azərbaycanın Əfqanıstanda keçirilən əməliyyat çərçivəsində beynəlxalq sülh və təhlükəsizliyə verdiyi ardıcıl töhfəsinə görə təşəkkürünü ifadə edib.

Nazir Elmar Məmmədyarov Azərbaycanın NATO ilə etibarlı və davamlı tərəfdaşlıq əlaqələrinə malik olduğunu bildirərək, Fərdi Tərəfdaşlıq üzrə Fəaliyyət Planı, Planlaşdırma və Təhlil Prosesi, Əməliyyat İmkanları Konsepsiyası kimi proqramlar çərçivəsində ikitərəfli əməkdaşlığın inkişaf etdiyini vurğulayıb. O, Azərbaycanın NATO-nun Əfqanıstanda Qətiyyətli dəstək missiyasına töhfə verməkdə davam edəcəyini diqqətə çatdırıb.

Elmar Məmmədyarov Ermənistan-Azərbaycan münaqişəsinin regionda sabitlik və təhlükəsizliyə əsas təhdid olduğunu qeyd edərək, münaqişənin həllinə nail olmaq üçün Ermənistan qoşunlarının işğal olunmuş bütün Azərbaycan ərazilərindən çıxarılmalı olduğunu nəzərə çatdırıb.

Görüşdə qarşılıqlı maraq doğuran regional və beynəlxalq məsələlər ətrafında fikir mübadiləsi aparılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi