Yuxarı
    Bağlamaq

    Elmar Məmmədyarov Almaniya kanslerinin müşaviri ilə görüşüb

    ​Görüşdə iki dövlət arasında mövcud olan siyasi dialoq və iqtisadi əməkdaşlığın yüksək səviyyəsindən məmnunluq ifadə edilib

    Bakı. 11 may. REPORT.AZ/ Mayın 11-də Azərbaycan xarici işlər naziri Elmar Məmmədyarov Almaniya Federativ Respublikasına işgüzar səfər edib. 

    XİN-dən "Report"a verilən məlumata görə, səfər çərçivəsində nazir Elmar Məmmədyarov Almaniya kansleri Angela Merkelin xarici əlaqələr və təhlükəsizlik siyasəti məsələləri üzrə müşaviri, həmçinin Kansler Administrasiyasının Xarici, təhlükəsizlik və inkişaf siyasəti üzrə İdarəsinin rəisi Kristof Hoysqenlə görüşüb.

    Görüş zamanı Azərbaycan-Almaniya və Azərbaycan-Avropa İttifaqı münasibətləri, enerji əməkdaşlığı, TAP və TANAP layihələri, iqtisadi əməkdaşlıq, Ermənistan-Azərbaycan münaqişəsi, beynəlxalq və regional məsələlərə dair fikir mübadiləsi aparılıb.

    Nazir Elmar Məmmədyarov Ermənistan-Azərbaycan münaqişəsinə dair son vəziyyətlə bağlı məlumat verərək, Ermənistan Silahlı Qüvvələrinin hərbi əməliyyatlar zamanı azərbaycanlı mülki əhaliyə qarşı yönəlmiş müharibə cinayətləri törətməsi və bu fonda Ermənistan tərəfinin təxribat xarakterli bəyanatlar verməsini vurğulayıb, münaqişənin həlli prosesində ATƏT-in fəallıq göstərməsinin vacibliyini qeyd edib və bu xüsusda, Almaniyanın ATƏT-ə sədrliyi dövründə töhfə verə biləcəyinə ümidvar olduğunu ifadə edib.

    Görüşdə iki dövlət arasında mövcud olan siyasi dialoq və iqtisadi əməkdaşlığın yüksək səviyyəsindən məmnunluq ifadə edilib, Azərbaycan Respublikasının Prezidenti İlham Əliyevin Almaniyaya son iki ildəki səfərlərinin dövlətlərimiz arasında münasibətlərin inkişafına mühüm töhfə verdiyi vurğulanıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi