Daşkənddə MDB Hökumət Başçıları Şurasının iclası keçiriləcək

Bakı. 1 noyabr. REPORT.AZ/ Cari ilin noyabr ayının 3-də Özbəkistanın paytaxtı Daşkənd şəhərində MDB Hökumət Başçıları Şurasının (MDB HBŞ) iclası keçiriləcək.

“Report” xəbər verir ki, iclasda Rusiya, Belarus, Qazaxıstan, Qırğızıstan, Tacikistan və Ermənistanın baş nazirləri iştirak edəcəklər.

Azərbaycan və Türkmənistan görüşdə baş nazirin müavinləri, Moldova isə MDB-nin nizamnamə və digər orqanları yanında səlahiyyətli nümayəndə səviyyəsində təmsil olunacaq.

Özbəkistan prezidenti Şövkət Mirziyev iştirakçı dövlətlərin nümayəndə heyətlərinin rəhbərlərini qəbul edəcək.

Görüşdə 18 sənəd layihəsi müzakirə olunacaq, həmçinin növbəti görüşün keçiriləcəyi tarix razılaşdırılacaq.