Yuxarı
    Bağlamaq

    BMT-nin İşgəncələrin Qarşısının Alınması Üzrə Alt Komitəsinin nümayəndələri Azərbaycana səfər edəcək

    SPT nümayəndə heyətinin üzvləri: Aişa Şujun Muhamməd, Miloş Yankoviç, Margret Osterfeld və Viktor Zahariadır

    Bakı. 14 aprel. REPORT.AZ/ İşgəncələrin Qarşısının Alınması Üzrə BMT-nin Alt Komitəsinin (SPT) nümayəndə heyəti aprelin16-dan 24-dək Azərbaycanda səfərdə olacaq. "Report" xəbər verir ki, bununla bağlı BMT-nin Azərbaycandakı nümayəndəliyi məlumat yayıb. Məlumatda qeyd olunub ki, Alt Komitə nümayəndələrinin Azərbaycana bu dəfəki gəlişi keçən ilin sentyabr ayında təxirə salınan səfəri davam etdirmək məqsədilə həyata keçirilir.  

    Dörd nəfərlik heyətə rəhbərlik edən Ayşə Şujun Muhamməd qeyd edib ki, Azərbaycanda fəaliyyət göstərən istənilən azadlıqdan məhrumetmə yerlərinə məhdudiyyətsiz giriş üçün şəraitin yaradılacağına dair rəsmi Bakıdan zəmanət alıblar. 

    İşgəncələrin Qarşısının Alınması Üzrə BMT-nin Alt Komitəsinin vəzifəsi məhbuslara qarşı işgəncə, qəddar, qeyri-insani və ya ləyaqəti alçaldan rəftarın qarşısının alınması və bu kimi halların aradan qaldırılmasından ibarətdir. Eyni zamanda o, İşgəncələrə qarşı Konvensiyanın Fakültativ Protokolunun (OPCAT) tərəfləri olan bütün dövlətlərə səfər etmək mandatına malikdir.

    Azərbaycana doqquz günlük səfər  zamanı nümayəndə heyəti azadlıqdan məhrumetmə yerlərini ziyarət edəcək, Azərbaycan rəsmiləri və digər maraqlı tərəflərlə görüşlər keçirəcək. Səfərdən sonra SPT azadlıqdan məhrum edilmiş şəxslərə qarşı işgəncə və pis rəftarın qarşısının alınması ilə bağlı müşahidə və tövsiyələrindən ibarət məxfi hesabatını Azərbaycan hökumətinə təqdim edəcək.

    Nümayəndə heyətinə Aişa Şujun Muhamməd, Miloş Yankoviç, Margret Osterfeld və Viktor Zaharia daxildir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi