Yuxarı

​Baş konsul: “Alfred Nobel təsəvvürünə gətirə bilməzdi ki, təsis etdiyi bu mükafat Bakını qan çanağına çevirmiş şəxsə veriləcək”

Azərbaycanın Los Ancelesdəki baş konsulunun 20 Yanvar faciəsinə dair məqaləsi dərc olunub

Bakı. 17 yanvar. REPORT.AZ/ ABŞ Konqresinin ən nüfuzlu nəşri olan, senator və konqresmenlər, xarici siyasət ekspertləri və geniş ictimaiyyət tərəfindən mütəmadi olaraq izlənən “The Hill” qəzetində Azərbaycanın Los Ancelesdəki baş konsulu Nəsimi Ağayevin məqaləsi dərc olunub. Bu barədə “Report”a Azərbaycan XİN-in mətbuat xidmətindən bildirilib.

“Qara Yanvar və haqsız yerə verilmiş Nobel Sülh Mükafatı” başlıqlı məqalədə 25 il öncə baş vermiş qanlı 20 Yanvar hadisələrindən və Azərbaycan xalqının öz azadlığı uğrunda apardığı mübarizədən bəhs edilir.

Həmin hadisələr zamanı, Sovet qoşunları tərəfindən böyük sayda günahsız insanın amansızcasına qətlə yetirildiyini bildirən müəllif, Ümummilli Lider Heydər Əliyevin faciədən dərhal sonra Moskvadakı Azərbaycan SSR-nin nümayəndəliyinə gedərək, qətliamı kəskin şəkildə pislədiyini, bunun isə Azərbaycan xalqının azadlıq mücadiləsini daha da ilhamlandırdığını qeyd edir.

Həmçinin, baş konsul mühüm bir fakta diqqət çəkərək bildirir ki, 1990-cı ilin 15 oktyabrında Nobel Sülh Mükafatı Komitəsi bəlkə də öz tarixində ən qeyri-adi qərarını verərək, Sovet İttifaqının prezidenti Mixail Qorbaçovu Nobel Sülh Mükafatına layiq görmüşdü. Müəllif vurğulayır ki, bununla, mükafatın verilməsindən çox deyil – 10 ay əvvəl M.Qorbaçovun birbaşa əmrilə Bakıda törədilmiş Qara Yanvar qətliamını “unudan” Komitə, əli yüzlərlə günahsız azərbaycanlının qanına batmış bir şəxsi mükafatlandırmışdı.

N.Ağayev digər bir maraqlı tarixi faktı da vurğulayaraq qeyd edir ki, Alfred Nobel və onun qardaşlarının Bakı neftindən əldə etdikləri böyük sərvət olmasaydı, 1901-ci ildə Nobel mükafatının təsisi mümkün olmazdı. Müəllif əlavə edir: “Ancaq A.Nobel təsəvvürünə belə gətirə bilməzdi ki, təsis etdiyi bu mükafat bir gün həmin Bakını qan çanağına çevirmiş şəxsə veriləcək.”

Diplomat, həmçinin müstəqilliyinin bərpasından keçən dövr ərzində Azərbaycanın sürətlə inkişaf etdiyini, siyasi və iqtisadi mövqelərinin həm regional, həm də qlobal səviyyədə möhkəmləndiyini qeyd edərək, ölkənin müstəqilliyinin güclü və dönməz olduğunu diqqətə çatdırır.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi