Azərbaycan və Türkiyənin dövlət qurumları arasında üçillik razılaşma əldə olunub

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndə heyəti Türkiyə Respublikası Prezidenti Administrasiyasının Rəqəmsal Transformasiya Ofisi və digər əlaqəli qurumlarla görüşlərin keçirilməsi məqsədilə Ankara şəhərində səfərdə olub.

Bu barədə "Report"a Dövlət Agentliyindən məlumat verilib.

Türkiyə Respublikası Prezidenti Administrasiyasının Rəqəmsal Transformasiya Ofisi ilə keçirilmiş görüş zamanı 25 fevral 2020-ci il tarixində tərəflər arasında imzalanmış Anlaşma Memorandumunun implementasiya çərçivəsində həyata keçirilən işlər və planlaşdırılan layihələr barədə müzakirələr aparılıb. Eyni zamanda 2022-2024-cü illəri əhatə edəcək üçillik Fəaliyyət Planının layihəsinin hazırlanması ilə əlaqədar ilkin razılığa gəlinib.

Həmçinin görüş zamanı 2019-cu ilin iyun ayında Bakıda keçirilmiş “BMT Dövlət Xidmətləri Forumu” çərçivəsində təsis olunmuş və Türkiyə tərəfinin də imzası olduğu “Dövlət Xidmətləri Göstərən Qurumların ASAN Beynəlxalq Assosiasiyası”nın fəaliyyəti ilə əlaqədar danışıqlar həyata keçirilib.

Tükiyə Respublikasının müvafiq sahələr fəaliyyət göstərən digər qurum və təşkilatları ilə keçirilən görüşlər zamanı Azərbaycanın “ASAN xidmət” və rəqəmsal xidmətlər sahəsində mövcud təcrübəsi haqqında ətraflı məlumat verilib, eləcə də dövlət xidmətlərinin rəqəmsallaşdırılması və inkişaf etdirilməsi ətrafında geniş fikir mübadiləsi aparılıb.