Azərbaycanın müdafiə sənayesi naziri “Dubai EXPO-2020” sərgisini ziyarət edib

“Dubai Airshow 2021” 17-ci aviasiya sərgisində iştirak etmək üçün Birləşmiş Ərəb Əmirliklərində (BƏ) rəsmi səfərdə olan Azərbaycanın müdafiə sənayesi naziri Mədət Quliyev rəhbərlik etdiyi nümayəndə heyəti ilə birlikdə “Dubai EXPO-2020” beynəlxalq sərgisini də ziyarət edib.

Bu barədə "Report"a Müdafiə Sənayesi Nazirliyindən məlumat verilib.

Bildirilib ki, 2021-ci ilin 1 oktyabr tarixində start götürən və 2022-ci ilin 31 mart tarixinədək davam edəcək “Dubai EXPO-2020” ümumdünya sərgisində Azərbaycan milli pavilyonu “Gələcəyin toxumları” mövzusu ilə təmsil olunur.

Heydər Əliyev Mərkəzinin təşkil etdiyi Azərbaycan milli pavilyonunda ziyarətçilərə Azərbaycanın mədəni irsi, tarixi barədə ətraflı məlumat verilir.

Eyni zamanda əzəli Azərbaycan torpağı olan Qarabağın tarixi, mədəniyyəti və qədim Şuşa şəhəri haqqında məlumatlar ziyarətçilərə çatdırılır.

Azərbaycanın milli pavilyonunu ziyarət edən nazir Mədət Quliyev daha sonra qardaş Türkiyənin və digər dövlətlərin pavilyonları ilə də tanış olub.