Yuxarı
    Bağlamaq

    Azərbaycanın İtaliyadakı səfiri etimadnaməsini FAO-nun baş direktoruna təqdim edib

    Görüş zamanı FAO və Azərbaycan arasında əlaqələrin mövcud vəziyyəti və inkişaf perspektivləri barədə fikir mübadiləsi aparılıb

    Bakı. 19 aprel. REPORT.AZ/ Azərbaycanın İtaliyadakı səfiri Məmməd Əhmədzadə Azərbaycanın BMT-nin Roma şəhərində agentlikləri yanında daimi nümayəndəsi təyin olunması ilə bağlı etimad məktubunu BMT-nin Ərzaq və Kənd Təsərrüfatı Təşkilatının (FAO) baş direktoru Jose Graziano da Silvaya təqdim edib.

    Səfirlikdən "Report"a verilən məlumata görə, etimad məktubu təqdim edildikdən sonra səfir M.Əhmədzadə ilə baş direktor Jose Graziano da Silva arasında görüş keçirilib.

    Görüş zamanı baş direktor Azərbaycanla FAO arasında münasibətlərin yüksək səviyyəsini qeyd edərək Azərbaycan prezidenti İlham Əliyevin 2014-cü ilin iyul ayında Romaya səfəri zamanı, həmçinin özünün Azərbaycana 2012-ci və 2015-ci illərdə səfərləri zamanı onunla görüşlərini məmnunluqla xatırlamışdır. O, ötən il Bakı şəhərində təsis olunmuş FAO-nun Tərəfdaşlıq və Əlaqələndirmə Ofisinin bu əlaqələrin inkişafına bir daha öz töhfəsini verəcəyinə ümid etdiyini bildirib.

    M.Əhmədzadə Azərbaycan hökumətinin FAO ilə əlaqələrə xüsusi diqqət yetirdiyini, bu əlaqələrin ölkəmizdə kənd təsərrüfatı sahəsində islahatların aparılmasında və bu sahənin inkişafında önəmli olduğunu bildirib. Azərbaycan diplomatı Azərbaycanda iqtisadiyyatın şaxələndirilməsində və qeyri-neft ixracının artırılmasında kənd təsərrüfatı sektorunun prioritet olduğunu bildirmiş, bu sahədə son illərdə əldə edilmiş nailiyyətlər barədə məlumat verib.

    Görüş zamanı FAO və Azərbaycan arasında əlaqələrin mövcud vəziyyəti və inkişaf perspektivləri barədə fikir mübadiləsi aparılıb. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi