Azərbaycan və Qırğızıstan XİN başçılarının görüşü olub - YENİLƏNİB - 3

Azərbaycan və Qırğızıstan XİN başçılarının görüşü olub - YENİLƏNİB - 3 Xarici işlər naziri Ceyhun Bayramovla Azərbaycana rəsmi səfərdə olan Qırğız Respublikasının xarici işlər naziri Ruslan Kazakbayev arasında görüş başlayıb.
Xarici siyasət
303
2 İyul , 2021 15:10
Azərbaycan və Qırğızıstan XİN başçılarının görüşü olub - YENİLƏNİB - 3
Ceyhun Bayramov və Ruslan Kazakbayev

Xarici İşlər Nazirliyi xarici işlər naziri Ceyhun Bayramovla qırğızıstanlı həmkarı Ruslan Kazakbayevin görüşü barədə məlumat yayıb.

"Report" xəbər verir ki, məlumatda deyilir:

Hər iki tərəfdən geniş tərkibli nümayəndə heyətlərinin iştirakı ilə keçirilən görüşdə Azərbaycan və Qırğızıstan arasında ikitərəfli əməkdaşlıq gündəliyinə daxil olan məsələlər, beynəlxalq təşkilatlar çərçivəsində əməkdaşlıq, habelə regional təhlükəsizlik məsələləri müzakirə edilib.

Həmkarını səmimiyyətlə salamlayan nazir Ceyhun Bayramov Azərbaycan və Qırğız xalqları arasında mövcud olan tarixi, mədəni və dini bağların iki ölkə arasında əlaqələrin əsasını təşkil etdiyini qeyd edərək, inkişaf etməkdə olan ikitərəfli dostluq və əməkdaşlıq münasibətlərini məmnunluqla ifadə edib. İki ölkə arasında yüksək səviyyəli səfər mübadilələrinin münasibətlərin inkişafına təkan verdiyi qeyd olunub. Nazir, dost ölkə Qırğızıstanın bu günədək Azərbaycanın beynəlxalq hüquqa əsaslanan ədalətli mövqeyinə verdiyi dəstəyin tərəfimizdən yüksək qiymətləndirildiyini vurğulayıb.

Nazir Ruslan Kazakbayev Qırğızıstan və Azərbaycan arasında tarixi bağları və qardaşlıq münasibətlərini qeyd edərək, əlaqələrin ikitərəfli və çoxtərəfli platformalarda uğurla inkişaf etdiyini vurğulayıb. Azərbaycanla münasibətlərə önəm verildiyini qeyd edən Qırğızıstan naziri, ikitərəfli əlaqələrin strateji tərəfdaşlıq səviyyəsinə yüksəldilməsi marağını ifadə edib.

Nazirlər ikitərəfli gündəliyin bir çox istiqamətləri, iqtisadi-ticarət əlaqələrinin genişləndirilməsi, nəqliyyat, tranzit sahəsində əməkdaşlıq, o cümlədən Ələt Azad İqtisadi Zonasına investorların cəlb edilməsi, habelə kənd təsərrüfatı, turizm, humanitar, mədəniyyət, təhsil sahələrində əməkdaşlıq perspektivləri müzakirə olunub. Birgə Hökumətlərarası Komissiyanın fəaliyyətinin dəstəklənməsi, biznes forumların keçirilməsinin əhəmiyyəti vurğulanıb.

Nazir Ceyhun Bayramov həmkarına münaqişə sonrası bölgədə mövcud olan vəziyyət, xüsusilə də azad edilmiş ərazilərdə onilliklər ərzində törədilmiş dağıntılar, tarixi -mədəni irsin məhv edilməsi, ətraf mühitə böyük zərərin vurulması, habelə mina təhlükəsi barədə danışıb. Bu ərazilərdə hazırda aparılan bərpa və quruculuq işləri barədə məlumat verib.

Tərəflər, həmçinin ikitərəfli əməkdaşlığın genişləndirilməsi imkanları, növbəti il diplomatik münasibətlərin qurulmasının 30 illiyinin qeyd edilməsi üzrə fikir mübadiləsi aparıblar.

Görüşün sonunda nazirlər "Azərbaycan Respublikasının Xarici İşlər Nazirliyi və Qırğız Respublikasının Xarici İşlər Nazirliyi arasında 2021-2022-ci illər üzrə Əməkdaşlıq Proqramı" sənədini imzalayıblar.

11:05

Azərbaycan və Qırğızıstan xarici işlər nazirləri Ceyhun Bayramov və Ruslan Kazakbayev arasında nümayəndə heyətlərinin iştirakı ilə geniş tərkibli görüşü keçirilir.

"Report" xəbər verir ki, bu barədə Azərbaycan XİN tvitterdə məlumat yayıb.

10:55

Azərbaycanın xarici işlər naziri Ceyhun Bayramov və Qırğızıstanın xarici işlər naziri Ruslan Kazakbayev arasında təkbətək görüş başa çatıb.

"Report" xəbər verir ki, bu barədə Azərbaycan XİN tvitterdə məlumat yayıb.

10:09

Xarici işlər naziri Ceyhun Bayramovla Azərbaycanda rəsmi səfərdə olan Qırğızıstanın xarici işlər naziri Ruslan Kazakbayev arasında görüş başlayıb.

“Report” xəbər verir ki, bu barədə Azərbaycan Xarici İşlər Nazirliyi tvitterdə məlumat yayıb.

C.Bayramov qırğızıstanlı həmkarını salamlayıb.

Son xəbərlər

Orphus sistemi