Yuxarı
    Bağlamaq

    Azərbaycan və Çinin Xarici İşlər Nazirlikləri arasında siyasi məsləhətləşmələr keçirilib

    Görüşdə bir sıra mühüm məsələlər müzakirə edilib

    Bakı. 11 avqust. REPORT.AZ/ Azərbaycan və Çin Xalq Respublikasının Xarici İşlər Nazirlikləri (XİN) arasında növbəti siyasi məsləhətləşmələr keçirilib

    Xarici İşlər Nazirliyinin mətbuat xidmətindən "Report"a verilən məlumata görə, hər iki ölkənin xarici işlər nazirinin müavinləri Xələf Xələfov və Li Huilai siyasi məsləhətləşmələr çərçivəsində ikitərəfli münasibətlərin hazırki vəziyyəti və inkişaf perspektivlərini müzakirə ediB, regional və qarşılıqlı maraq kəsb edən beynəlxalq məsələlər ətrafında geniş fikir mübadiləsi aparıb.

    Xələf Xələfov Azərbaycan və Çin arasında ikitərəfli münasibətlərin hazırda bütün istiqamətlər üzrə yüksələn xətlə inkişaf etdiyini bildirərək, Çin ilə münasibətlərin Azərbaycan üçün prioritet istiqamət olduğunu qeyd edib.

    Hər iki ölkənin rəhbərləri tərəfindən əsası qoyulmuş siyasi dialoqun yüksək səviyyəli və intensiv xarakterli qarşılıqlı səfərlərlə daha da möhkəmləndirildiyini bildirən X.Xələfov Azərbaycan Respublikasının Prezidenti İlham Əliyevin 2015-ci ildə Çinə rəsmi səfərini xatırladaraq, səfər çərçivəsində imzalanmış çoxsaylı sənədlərin və əldə olunmuş razılaşmaların ikitərəfli münasibətlərin hazırkı səviyyəyə yüksəldilməsinə əsaslı təkan verdiyini vurğulayıb.

    Azərbaycanın Çinlə əməkdaşlığın bütün sahələrində, xüsusilə uzunmüddətli iqtisadi münasibətlər qurmaqda maraqlı olduğunu qeyd edərək, Çin şirkətlərinin Azərbaycan iqtisadiyyatında iştirakı, həmçinin Azərbaycan şirkətlərinin Çinin iqtisadi subyektləri ilə ticari-iqtisadi əlaqələrin inkişafının təqdirəlayiq hal olduğunu bildirib. X.Xələfov iki ölkə arasında iqtisadi münasibətlərin dərinləşməsində Hökumətlərarası İqtisadi Komissiyasının fəaliyyətini xüsusilə qeyd edib.

    X.Xələfov Azərbaycanda qeyri-neft sektorunun inkişafı məqsədilə həyata keçirilən köklü islahatlar barədə danışaraq, energetika, sənaye, nəqliyyat, kommunikasiya, informasiya texnologiyaları, turizm, ticari əlaqələrin genişləndirilməsi və şaxələndirilməsi sahəsində əməkdaşlıq üçün geniş imkanlar olduğunu bildirib.

    Qlobal xarakterli irimiqyaslı enerji və nəqliyyat layihələrini həyata keçirərək və bu layihələrin reallaşdırılmasında etibarlı tərəfdaş kimi çıxış edərək Azərbaycanın Çinin irəli sürdüyü “Bir kəmər-bir yol” təşəbbüsünü dəstəklədiyini qeyd edib.

    Nazir müavini Azərbaycanın müstəqilliyinin bərpasının ilk günlərindən Çin hökumətinin Azərbaycanın müstəqilliyi, suverenliyi və ərazi bütövlüyünə qəti və dəyişməz dəstəyinin yüksək qiymətləndirildiyini vurğulayaraq, Azərbaycanın “Vahid Çin” prinsipini siyasi münasibətlərin qurulmasının ilk anlarından etibarən birmənalı və ardıcıl olaraq dəstəklədiyini diqqətə çatdırıb. O, müstəqillik, suverenlik və ərazi bütövlüyünə qarşılıqlı hörmətin ən yüksək səviyyədə imzalanmış sənədlərdə də öz əksini tapdığını və siyasi planda ölkələrimiz arasında heç bir fikir ayrılığının mövcud olmadığını əlavə edib. X.Xələfov Ermənistan-Azərbaycan Dağlıq Qarabağ münaqişəsi ilə bağlı Azərbaycanın ədalətli mövqeyinə verdiyi qəti dəstəyə görə Çin tərəfinə təşəkkür edib.

    Azərbaycanı Çinin ənənəvi tərəfdaş və dostu adlandıran Li Huilai iki ölkə arasında münasibətlərin qurulmasında Ümumilli lider Heydər Əliyevin müstəsna xidmətlərini qeyd edib və bu siyasi xəttin Prezident İlham Əliyev tərəfindən müvəffəqiyyətlə davam etdirilməsindən məmnunluğunu bildirib. O, Azərbaycan-Çin münasibətlərinin təməlini qoymuş Azərbaycanın Ümummilli Lideri Heydər Əliyevin Azərbaycanla yanaşı, Çin xalqı arasında da böyük rəğbət və ehtiramla anıldığını əlavə edib.

    Li Huilai “Vahid Çin” prinsipinin Azərbaycan tərəfindən dəstəklənməsinin yüksək qiymətləndirildiyini bildirib və Çin hökumətinin Azərbaycanın müstəqilliyi, suverenliyi və ərazi bütövlüyü, eləcə də Azərbaycan hökumətinin sabitliyin təmin edilməsində həyata keçirdiyi siyasəti dəstəklədiyini bir daha bəyan edib. Li Huilai xüsusilə BMT Təhlükəsizlik Şurasının Ermənistan-Azərbaycan Dağlıq Qarabağ münaqişəsi üzrə qəbul etdiyi məlum qətnamələrin yerinə yetirilməsinin dəstəklənməsinə dair Çinin mövqeyinin aydın və dəyişməz olduğunu diqqətə çatdırıb. Həmçinin Cənubi Qafqaz regionunda sülh və sabitliyin qorunub-saxlanılmasında Çinin konstruktiv rol oynamağa hazır olduğunu əlavə edib. O cümlədən, son hadisələr nəticəsində cəbhə xəttində həlak olanlar ilə əlaqədar başsağlığı verib.

    Asiya və Avropa arasındakı nəqliyyat qövşağında yerləşən Azərbaycanın “Bir kəmər-bir yol” layihəsi çərçivəsində əsas bağlayıcı rolunu vurğulayan qonaq, regionda Ölkəmizin iştirakı ilə həyata keçirilən bir çox əhəmiyyətli layihələrin inkişafının məmnunluqla qarşılandığını ifadə edib.

    Ölkəsi üçün Azərbaycanın Avrasiya regionunda əsas tərəfdaşlardan biri olduğunu bildirən Li Huilai müasir İpək Yolunun inkişaf etdirilməsində Çinin Azərbaycan tərəfi ilə birgə fəaliyyətə hazır olduğunu qeyd edib.

    Ölkələrimiz arasındakı ticarət dövriyyəsinin daha da artırılması üçün böyük potensialın mövcudluğunu qeyd edən çinli diplomat Azərbaycan məhsullarının Çinə ixracının təşviq olunmasının vacibliyini bildirib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi