Bakı. 11 iyul. REPORT.AZ/ Bakıda gələn həftə Azərbaycan, Türkiyə və Türkmənistan xarici işlər nazirlərinin - Elmar Məmmədyarov, Mövlud Çavuşoğlu və Rəşid Meredovun üçtərəfli görüşü keçiriləcək.
Bu barədə "Report" diplomatik mənbələrə istinadən xəbər verir.
Görüş iyulun 18-19-na planlaşdırılır.
"Hələlik nazirlərin görüşünün proqramı hazırlanır. Müəyyən dəyişikliklər də mümkündür", - diplomatik mənbə bildirib.
Üç ölkənin XİN başçısı Bakıda regional və üçtərəfli əməkdaşlıq məsələlərini, eləcə də üç ölkə tərəfindən həyata keçirilən layihələri müzakirə etmək niyyətindədir.