Yuxarı

Almaniyanın “Karl Storz” şirkəti Azərbaycanın işğal olunmuş ərazilərindəki fəaliyyətini dayandırıb

“Karl Storz” şirkəti və şirkətin təmsilçisi Merab Mqaloblişvilinin adı Azərbaycanda arzuolunmayan şəxslərin və qurumların siyahısından çıxarılıb

Bakı. 16 oktyabr. REPORT.AZ/ Tibb və sənaye sahəsində istifadə edilməsi üçün avadanlıq və digər məhsulların istehsalı və satışı ilə məşğul olan Almaniyanın “Karl Storz” şirkətinin məsul nümayəndəsi Stefan Dubnak rəsmi məktubla müraciət edərək, təmsil etdiyi şirkətin adının “Ermənistanın işğal etdiyi Azərbaycan Respublikasının ərazilərində iqtisadi və digər qanunsuz fəaliyyət növü ilə məşğul olan xarici dövlətlərin fiziki və hüquqi şəxslər, təşkilat və qurumlarının siyahısı” və həmin şirkətin Ermənistan və Gürcüstan üzrə meneceri Merab Mqaloblişvilinin adının “Azərbaycan Respublikasının işğal edilmiş ərazilərinə qanunsuz səfər etmiş əcnəbilərin siyahısı”ndan çıxıarılmasını xahiş edib.

Bu barədə "Report"a Xarici İşlər Nazirliyinin mətbuat xidmətindən məlumat verilib. 

Nazirliyin informasiyasına görə, S.Dubnak məktubunda M.Mqaloblişvilinin sözügedən ərazilərə Azərbaycan Respublikasının müvafiq qurumları tərəfindən icazə alınmadan səfər etdiyinə görə üzrxahlığını bildirib.

Həmçinin, S.Dubnak məktubunda BMT Təhlükəsizlik Şurasının qəbul etdiyi məlum qətnamələrə toxunaraq, Azərbaycanın ərazi bütövlüyü, suverenliyi, beynəlxalq səviyyədə tanınan sərhədlərinin toxunulmazlığına hörmət ifadə edib və Ermənistanın Azərbaycan ərazilərinin işğalı faktını pisləyib.

S.Dubnak təmsil etdiyi şirkətin qanunsuz fəaliyyətə cəlb edilməsinə və şirkət nümayəndəsinin qanunsuz səfərinə dair peşmançılıq ifadə edərək, şirkət tərəfindən həmin ərazilərdə bütün fəaliyyətin artıq dayandırıldığını bildirib və gələcəkdə bu kimi qanun pozuntusuna heç bir halda yol verilməyəcəyinə dair öhdəlik götürüb.

Əlavə olaraq, M.Mqaloblişvili tərəfindən də Azərbaycan tərəfinin tələblərinə uyğun rəsmi məktub ünvanlanıb.

“Karl Storz” şirkəti və M.Mqaloblişvilinin müraciəti müvafiq qaydada nəzərdən keçirilib və şirkət və nümayəndəsinin adlarının müvafiq siyahılardan çıxarılması barədə qərar qəbul edilib

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi