Yaponiya səfiri ilə Qarabağda turizmin inkişaf perspektivi müzakirə edilib

Yaponiya səfiri ilə Qarabağda turizmin inkişaf perspektivi müzakirə edilib Bu gün Dövlət Turizm Agentliyinin (DTA) sədri Fuad Nağıyev Yaponiyanın Azərbaycandakı səfiri Vada Cüniçini qəbul edib.
Turizm
545
6 Noyabr , 2020 15:02
Yaponiya səfiri ilə Qarabağda turizmin inkişaf perspektivi müzakirə edilib
Vada Cüniçi və Fuad Nağıyev

Bu gün Dövlət Turizm Agentliyinin (DTA) sədri Fuad Nağıyev Yaponiyanın Azərbaycandakı səfiri Vada Cüniçini qəbul edib.

Bu barədə “Report”a DTA-dan məlumat verilib.

Görüşdə iki ölkə arasında mövcud turizm əlaqələri və əməkdaşlıq perspektivləri haqqında müzakirələr aparılıb.

F.Nağıyev V.Cüniçini Azərbaycana yeni təyinatı münasibətilə təbrik edib, ona fəaliyyətində uğurlar arzulayıb.

Görüş zamanı Agentlik sədri 30 ilə yaxındır ki, Ermənistanın işğalı altında olan Dağlıq Qarabağda erməni vandalizmi nəticəsində Azərbaycanın turizm potensialına vurulan zərər, işğalçılar tərəfindən məqsədli şəkildə turizm əhəmiyyətli məkanlarının dağıdılması siyasəti və bu kimi digər məqamlar barəsində məlumat verib. O, Ali Baş Komandanın rəhbərliyilə Azərbaycan Ordusunun sentyabrın 27-dən apardığı uğurlu əks-həmlə əməliyyatı ilə işğal altına olan torpaqlarının azad edilməsindən bəhs edərək Qarabağda turizmin inkişaf perspektivlərindən danışıb.

Səfir isə, öz növbəsində, tezliklə sülhün bərqərar olunacağına inamını ifadə edib. O bildirib ki, ölkələrimiz arasında ikitərəfli diplomatik əlaqələr yüksələn xətt üzrə inkişaf edir.

Qeyd olunub ki, son illərdə Azərbaycan ilə Yaponiya arasında bir çox sahələrdə olduğu kimi turizm sahəsində də qarşılıqlı əlaqələr genişlənməkdədir.

Müzakirələr zamanı iki ölkənin müvafiq turizm qurumları arasında razılaşma sənədinin imzalanması, Yaponiyanın turizm şirkətləri və media nümayəndələri üçün Azərbaycana tanışlıq səfərinin təşkil edilməsi və çarter reyslərin açılması kimi məsələlər barəsində fikir mübadiləsi aparılıb.

Görüş çərçivəsində, həmçinin postpandemiya dövründə turizm sahəsinin bərpası məqsədilə planlaşdırılan tədbirlər barədə qarşılıqlı məlumat və təcrübə mübadiləsinin aparılması məsələsi də müzakirə edilib.

Son xəbərlər

Orphus sistemi