Yuxarı
    Bağlamaq

    Nazir: "Avropadan Azərbaycana gələn turistlərin sayı 20-30% artıb"

    Bu il əsasən Rusiya, İran və Körfəz ölkələrindən turist axınının artacağı gözlənilir

    Bakı. 7 aprel. REPORT.AZ/ "Qlobal iqtisadi böhrana baxmayaraq, turizm səhəsi inkişaf etməkdə davam edir. Ümumdünya Turizm Təşkilatı ötən ilin statistikasını açıqlayıb, dünya üzrə turizm sahəsində 4%-lik artım olub". "Report" xəbər verir ki, bunu mədəniyyət və turizm naziri Əbülfəs Qarayev bu gün Bakıda işə başlayan XV Azərbaycan Beynəlxalq Turizm və Səyahətlər Sərgisinin (AITF 2016) açılışında deyib.

    "Azərbaycanda qeyri-neft sektorunun inkişaf etməsi sevindirici haldır. Bu il biz ötən ilə nisbətən ölkəyə daha çox turist axını gözləyirik. Qiymətlərin tənzimlənməsi məsələsi isə narahatçılığa səbəb olan əsas amillərdəndir. Bu sərgidə ölkə üzrə münasib qiymətə turpaketlər əldə etmək mümkün olacaq. Qiymətlərin tənzimlənməsi bu sahədə böyük rəqabətə səbəb olacaq. Eyni zamanda, son illər müşahidə etdik ki, Azərbaycana gələn turistlərin əksəriyyəti kənd evlərində qalmağa üstünlük verirlər. Məhz bu səbəbdən bu xidmətləri göstərən ev sahibləri üçün xüsusi təlimlər keçiririk", - deyə nazir qeyd edib. 

    Ə.Qarayev bildirib ki, bu il əsasən Rusiya, İran və Körfəz ölkələrindən turist axınının artacağı gözlənilir: "Eyni zamanda, bu gün AZAL-ın nümayəndələri ilə müzakirələr apardıq ki, Körfəz ölkələrinə birbaşa aviareyslər açılsın. Hazırda danışıqlar gedir. Amma son rəqəmlər onu göstərir ki, ölkəyə turist cəlb etmə sahəsində Avropa da önəmli yer tutur. Çünki hər il Avropa ölkələrindən Azərbaycana gələn turistlərin sayı artır. Rəqəmlərlə desək, Avropadan gələn turistlərin sayı 20-30% artıb".

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi