Yuxarı

Azərbaycanda müəllif hüquqlarının qorunması sahəsində yeni dövr başlayır

​Müəllif Hüquqları Agentliyi nəzarət markalarının (holoqramların) hazırlığı ilə bağlı gördüyü işləri açıqlayıb

Bakı. 9 mart. REPORT.AZ/ “Tərkibində müəlliflik hüququ və əlaqəli hüquqlarla qorunan əsərlərin olduğu məhsullara nəzarət markalarının (holoqramların) tətbiqi ilə əlaqədar bütün sistem işlənib hazırlanıb. Hazırda onlayn sifariş mexanizminin tətbiqi ilə əlaqədar “ASAN” xidmətlə danışıqlar aparılır”.

Bu barədə “Report”un sorğusuna cavab olaraq Müəllif Hüquqları Agentliyinin Əsərlərin qeydiyyatı və hüquq şöbəsindən bildirilib.

Şöbədən verilən məlumata görə, Müəllif Hüquqları Agentliyinin tabeliyində Əqli Mülkiyyət Hüquqlarının Təminatı Mərkəzi nəzarət markalarının çapı üçün lazımi texniki avadanlıqlarla təmin edilib: ““Nəzarət markaları”nın (holoqramların) tətbiqi işini gecikdirən səbəblərdən biri texniki avadanlıqlar və onların işini təmin edən xüsusi proqram təminatından istifadə idi. Bu məqsədlə ötən il Ukrayna Respublikasından sahə üzrə mütəxəssislər dəvət olundu və mərkəzin bütün işçilərinə təlimlər keçirildi. Hazırda mərkəzin əməkdaşları “Nəzarət markaları”nı (holoqramları) çap edən texniki avadanlıq və proqram təminatından istifadə üzrə həm nəzəri, həm də praktik biliklərə malikdirlər”.

Agentlikdən o da bildirilib ki, artıq respublika ərazisində audiovizual əsər və fonoqram istehsalçılarına, kompüter proqramlarının hüquq sahiblərinə, məlumat topluları və kitab naşirlərinə (hüquq sahiblərinə) müəlliflik hüququ və əlaqəli hüquqlar obyektlərinin nüsxələrinə nəzarət markalarının (holoqramların) yapışdırılması üçün sifariş vermələri barədə məktubların göndərilməsinə başlanılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi