Yuxarı
    Bağlamaq

    Koreyalı mütəxəssislər məcburi köçkünlərin məskunlaşdıqları ərazilərdə kəhriz su sistemlərini bərpa edəcəklər

    Fuad Hüseynov Koreya Beynəlxalq Əməkdaşlıq Agentliyinin Azərbaycan nümayəndəliyinin direktoru Choi Yonjaenlə görüşüb

    Bakı. 22 fevral. REPORT.AZ/ Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov Koreya Beynəlxalq Əməkdaşlıq Agentliyinin Azərbaycan nümayəndəliyinin direktoru Choi Yonjaenlə görüşüb.

    Bu barədə “Report”a Dövlət Komitəsinin mətbuat xidnmətindən məlumat verilib. 

    Məcburi köçkünlərin cəmiyyətə sosial-iqtisadi reinteqrasiyasını gücləndirmək məqsədi daşıyan “Azərbaycanda kəhriz su sistemlərinin bərpası vəsaitəsilə məcburi köçkünlərin məskunlaşdığı ərazilərdə kənd təsərrüfatının inteqrə edilmiş inkişafı” ilə bağlı təklif edilən layihənin texniki-iqtisadi əsaslandırılmasını müzakirə etmək üçün Koreyadan ezam olunan ekspert qrupunun da iştirak etdiyi görüşdə Azərbaycanla Koreya arasında son illər iqtisadi, siyasi əlaqələrin yeni mərhələyə qədəm qoyduğunu önə çəkən F.Hüseynov həmçinin ölkədəki məcburi köçkünlərin sosial problemlərinin həllində koreyalı mütəxəssislər tərəfindən bu cür humanitar layihələrin həyata keçirilməsini də deyilənlərin bariz nümunəsi kimi dəyərləndirib.

    Öncə koreyalı qonaqlara Ermənistan-Azərbaycan, Dağlıq Qarabağ münaqişəsi və bu münaqişə nəticəsində yaranmış 1 milyon 200 mindən çox qaçqın və məcburi köçkün problemi, onların sosial-məişət şəraitlərinin yaxşılaşdırılması istiqamətində Prezident İlham Əliyevin bu sahəyə müntəzəm qayğı və diqqəti sayəsində həyata keçirilən tədbirlər və digər bu kimi məsələlər barədə hərtərəfli məlumat verən F.Hüseynov diqqətə çatdırıb ki, ölkə belə bir ağır problemlə üzləşdiyi ilkin dövrlərdə əgər BMT qurumlarının, bir sıra ölkələrin, müxtəlif beynəlxalq humanitar təşkilatların köməyi olmasaydı, Azərbaycan humanitar fəlakətlə üz-üzə qalardı.

    Belə bir vaxtda Koreyanın humanitar təşkilatlarının da ölkədəki qaçqın və məcburi köçkünlərə göstərdiyi humanitar yardımların böyük önəm kəsb etdiyi vurğulanan görüşdə bildirilib ki, artıq öz iqtisadi imkanlarını getdikcə artıran Azərbaycan dövləti qaçqın və məcburi köçkün həyatı yaşayan vətəndaşlarının problemlərinin həllini öz üzərinə götürərək bu istiqamətdə dünyanın oxşar problemlərlə üzləşən ölkələri üçün nümunəyə çevrilib: "Ancaq bütün bunlar o demək deyil ki, indi Azərbaycanda beynəlxalq humanitar təşkilatların layihələrinə ehtiyac yoxdur. Əksinə, indi xüsusilə, icmaların inkişafına, məcburi köçkünlərin məşğulluğunun artırılmasına, təhsilə, səhiyyəyə, müxtəlif inkişaf layihələrinə ehtiyac duyulur ki, bu baxımdan Koreyanın Azərbaycanda məcburi köçkünlərin məskunlaşdıqları ərazilərdə kəhriz su sistemlərinin bərpası ilə bağlı layihə də olduqca mühüm əhəmiyyət kəsb edir".

    Koreyalı mütəxəssislərdən ibarət nümayəndə heyəti ilə aparılan müzakirələr zamanı bildirilib ki, layihə ilə əlaqədar Azərbaycana gəlmiş nümayəndə heyəti artıq regionlarda araşdırmalara başlayıb və məcburi köçkünlərlə keçirilən görüşlərdə onlar da bu layihənin həyata keçirilməsini müsbət dəyərləndiriblər.

    Sonda qonaqlar onları maraqlandıran müxtəlif suallara hərtərəfli cavab aldıqlarına və səmimi qəbula görə minnətdarlıqlarını bildiriblər. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi