“Könüllülük sərhəd tanımır!” aksiyası keçirilib

Azərbaycan Respublikasının Gənclər Fondu və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı, bütün könüllü təşkilatları və hərəkatlarının iştirakı ilə həyata keçirilən “Azərbaycan Könüllülük Həftəsi” 3 dekabr - Beynəlxalq Əlillər gününə həsr olunmuş “Könüllülük sərhəd tanımır!” devizi altında keçirilən tədbirlərlə davam edib.

Gənclər Fondundan "Report"a verilən məlumata görə, aksiyada iştirak edən 500 gənc könüllü Lənkəran, Zaqatala, Şəki, Quba, Mingəçevir, Gəncə şəhərlərində fəaliyyət göstərən uşaq evləri, internat məktəbləri və ahıllar evlərini ziyarət edərək bu müəssisələrin sakinlərinə öz dəstək və qayğılarını nümayiş etdirib, onların iştirakı ilə müxtəlif oyunlar və əyləncəli proqramlar təşkil ediblər.

Dekabrın 1-də “ŞəhidimİZ” və “VətənimİZ” kampaniyaları ilə start götürən “Azərbaycan Könüllülük Həftəsi” 9 dekabr tarixinə qədər bütün ölkəni əhatə edən kütləvi tədbirlərin, o cümlədən “TəbiətimİZ” adı altında ekoloji aksiyanın təşkili ilə davam edəcək.

Dekabrın 5-də Azərbaycan Könüllülərinin 2-ci Respublika Həmrəylik Forumunda və xüsusi konsert-əyləncə proqramında minlərlə gəncin iştirakı gözlənilir. Həftənin ən fəal 300 könüllüsü isə 4 günlük qış düşərgəsində faydalı istirahət və əyləncə, şəxsi inkişaf imkanı əldə edəcəkdir.

Bütün gənclərimizi “Azərbaycan Könüllülük Həftəsi”də fəal iştirak etməyə və bizi sosial şəbəkələrdə izləməyə dəvət edirik!