Gənclər sosial məsələlərin həllində incəsənət vasitələrindən istifadə edir

Bakı. 14 avqust. REPORT.AZ/ “MitOst” Assosiasiyasının maliyyə dəstəyi və təhsil sahəsində ixtisaslaşan Education HUB-ın təşkilatçılılğı ilə gənclər üçün “İncəsənət sosial inkişafda vasitə kimi” təliminin ilk mərhələsi keçirilib.

"Report" xəbər verir ki, “İnkişaf Zamanı” təhsil proqramı çərçivəsində baş tutan təlim avqustun 5-dən 11-dək Quba şəhərində təşkil olunub.

Layihənin əsas məqsədi sosial məsələlərin həllində incəsənət vasitələrindən istifadə edilməsinin təşviqidir.

Azərbaycanın müxtəlif bölgələrindən olan 18-28 yaş arasında 25 nəfər iştirakçı incəsənətin müxtəlif vasitələrindən istifadə etməklə yaşadıqları bölgə üçün yeni təşəbbüslər hazırlayıblar.