Gəncə, Masallı və Ucarda vahid əlaqələndirmə mərkəzləri fəaliyyətə başlayır

Gəncə, Masallı və Ucarda vahid əlaqələndirmə mərkəzləri fəaliyyətə başlayır Həmin mərkəzlərdə 19 şəhər və rayon üzrə şəhid ailələri və müharibə iştirakçılarının müraciətləri qəbul olunacaq
Sosial müdafiə
227
23 Dekabr , 2021 18:43
Gəncə, Masallı və Ucarda vahid əlaqələndirmə mərkəzləri fəaliyyətə başlayır

Prezident İlham Əliyevin Fərmanının icrası işlərinin davamı olaraq, şəhid ailələri və müharibə iştrakçılarının müraciətlərinin qəbulu məqsədilə dekabrın 24-də daha 3 şəhər və rayonda - Gəncə şəhərində, Masallı və Ucar rayonlarında da regional vahid əlaqələndirmə mərkəzləri fəaliyyətə başlayacaq.

Bu barədə "Report"a Əmək və Əhalinin Sosial Müdafiəsi Nazirliyindən məlumat verilib.

Mərkəzlərdə 6-sı dövlət orqanı (Əmək və Əhalinin Sosial Müdafiəsi Nazirliyi, Müdafiə Nazirliyi, Səhiyyə Nazirliyi, Səfərbərlik və Hərbi Xidmətə Çağırış üzrə Dövlət Xidməti, İcbari Tibbi Sığorta üzrə Dövlət Agentliyi, Dövlət Sığorta Kommersiya Şirkəti), 19-u aidiyyəti şəhər və rayonların icra hakimiyyətləri olmaqla, 25 qurum tərəfindən 26 istiqamətdə xidmətlər vahid məkandan, operativ, şəffaflıq, nəzakətlilik, məsuliyyət və rahatlıq prinsipləri əsasında təqdim ediləcək.

Mərkəzlər Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondunun Gəncə, Masallı, Ucar şəhərlərindəki ərazi filiallarının binasında fəaliyyət göstərəcək. Həmin şəhər və rayonlarla yanaşı, ətrafdakı bölgələr də daxil olmaqla ümumilikdə 19 rayon və şəhər üzrə şəhid ailələri və müharibə iştirakçılarına xidmət edəcək.

- Gəncə şəhərindəki vahid əlaqələndirmə mərkəzində (Gəncə şəhəri, Atatürk prospekti 12A) Gəncə, Naftalan şəhərləri, Daşkəsən, Goranboy, Göygöl, Samux rayonları üzrə,

- Masallı rayonundakı vahid əlaqələndirmə mərkəzində (Masallı şəhəri, Heydər Əliyev prospekti, 38) Masallı, Astara, Cəlilabad, Lerik, Lənkəran, Yardımlı rayonları üzrə,

- Ucar rayonundakı vahid əlaqələndirmə mərkəzində (Ucar şəhəri, Nəriman Nərimanov küçəsi,11) Ucar, Ağdaş, Göyçay, Kürdəmir, Yevlax, Zərdab rayonları və Mingəçevir şəhəri üzrə vətəndaşların müraciətləri qəbul olunacaq.

Qeyd edək ki, bu il avqustun 23-dən Bakıdakı DOST mərkəzlərində, noyabrın əvvəlindən isə Abşerondakı DOST mərkəzində vahid əlaqələndirmə mərkəzləri fəaliyyət göstərir və ötən dövrdə bu mərkəzlərdə 5700 şəxsə xidmətlər göstərilib.

Son xəbərlər

Orphus sistemi