Yuxarı

DSMF-nin fərdi uçot sistemində qeydiyyata alınan əcnəbilərin sayı artıb

Əcnəbilər arasında ən yüksək say göstəricisi Тürkiyə vətəndaşları üzrə müşahidə olunur

Bakı. 17 fevral. REPORT.AZ/ Cari ilin 1 fevral tarixinə olan statistikaya əsasən, ilin əvvəli ilə müqayisədə Dövlət Sosial Müdafiə Fondunun (DSMF) fərdi uçot sistemində qeydiyyata alınan əcnəbilərin sayı 0,66 faiz artıb. Bu barədə "Report"a DSMF-nin İctimaiyyətlə əlaqələr sektorundan məlumat verilib.

Yanvar ayı ərzində əlavə olaraq 150 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 22 663 nəfərə yüksəlib. Dövlət sosial sığorta sistemində fərdi şəxsi hesabı olan əcnəbilərin 89,06 faizini (20 188 nəfər) kişilər, 10,94 faizini (2 475 nəfər) isə qadınlar təşkil edir.

Ümumilikdə 104 ölkənin vətəndaşlarını əhatə edən əcnəbilər arasında ən yüksək say göstəricisi Türkiyə vətəndaşları (12083 nəfər) üzrə müşahidə olunur. Fərdi uçot sistemində qeydiyyata alınan əcnəbilərin sayına görə ikinci yerdə gələn Gürcüstan vətəndaşlarının sayı 2553 nəfərə, üçüncü yerdə gələn Rusiya vətəndaşlarının sayı isə 1311 nəfərə çatıb.

Sonrakı yerlərdə İran İslam Respublikası (875), Çin Xalq Respublikası (757), Hindistan (624), Pakistan İslam Respublikası (467), Böyük Britaniya və Şimali İrlandiya Krallığı (354), Ukrayna (257), Özbəkistan (238) Banqladeş Xalq Respublikası (206), Almaniya Federativ Respublikası (195), Filippin Respublikası (193), Türkmənistan Respublikası (184), ABŞ (171), Qazaxıstan Respublikası (163), İtaliya Respublikası (153), Koreya (143) və s. ölkələr qərarlaşıb.

Xatırladaq ki, 2006-cı il yanvarın 1-dən Azərbaycan mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin məcburi dövlət sosial sığortası ilə əhatə olunması prosesi həyata keçirilir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi