Azərbaycanda əlilliyə görə ödənilən pensiyaların hesablanmasında yenilik tətbiq ediləcək

Bakı. 15 dekabr. REPORT.AZ/ Azərbaycanda gələcəkdə əlilliyə görə ödənilən pensiyaların məbləği itirilmiş əmək qabiliyyətinin dərəcəsinə görə veriləcək. Azərbaycanın tətbiqini planlaşdırdığı yeni sistemin şərtlərinə əsasən, pensiyaçı yalnız sağlamlığının itirdiyi hissəsinə görə pensiya alacaq. Hazırda bununla bağlı Əmək və Əhalinin Sosial Müdafiəsi Nazirliyi ilkin hazırlıq işləri görür. "Report" un xəbərinə görə, bunu əmək və əhalinin sosial müdafiəsi naziri Səlim Müslümov jurnalistlərə bildirib.

"Bu gün əmək qabiliyyətini itirmiş insanlara, I, II və III qrup əlillərə mütləq şəkildə yanaşırıq. Amma sabah yeni sistemə keçəndə müəyyən olsa ki, bu insanın sağlamlığına dəymiş zərər nəticəsində əmək qabiliyyətinin, məsələn 65%-ni itiribsə, deməli, onun gəlirlərinin 65%-i kompensasiya olunacaq. Əmək qabiliyyətinin qalan 35%-i qarşılığında isə həmin şəxs gedib işləməli və gəlir əldə etməlidir. Bu sistemin formalaşmasına çalışırıq", - nazir deyib.

S.Müslümov qeyd edib ki, hazırda ölkədə əlilliyə görə pensiya alanların 80%-i II qrup əlilləridir: "Bu qrupda pensiyanın baza hissəsi tam verilir və qazandığı vəsaitə uyğun da sığorta hissəsi müəyyən olunur. Lakin III qrupda 50% verilir, I qrupda isə şəxsin işləmək imkanı yoxdur və mövcud sistem bunu təmzimləmək imkanı vermir".

Nazir əlavə edib ki, əlilliyi olan şəxslərin işlə təmin olunması üçün dövlət tərəfindən müvafiq şərait yaradılıb: "İşçilərinin sayı 10 nəfərdən artıq olan təşkilatlarda iş yerlərinin 3%-dək hissəsi əlilliyi olan şəxslər üçün ayrılmalıdır".

S.Müslümov bununla yanaşı yeni sistemə keçid zamanı müvafiq cərimələrin də tətbiq ediləcəyini istisna etməyb: "Dünya təcrübəsi göstərir ki, əlilliyi olan şəxslər üçün ayrıca iş yerlərinin açılması daha önəmlidir. Əgər gözləri görməyən insan sürücü ola bilməsə də, müəllim ola bilər. Yəni ona uyğun iş tapmaq lazımdır ki, o, cəmiyyətdə yerini tapıb çalışmağa davam etsin. Təbii ki, əmək qabiliyyətinin 100%-ni itirməyibsə".