Yuxarı

Ekspert: “Sürücülərlə polis arasındakı münasibətlər tənzimlənməlidir”

“Yol hərəkəti təhlükəsizliyinin təmin olunmasında ictimai təşəbüsslərin gücləndirilməsi” mövzusunda tədbir keçirilib

Bakı. 15 avqust. REPORT.AZ/ Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının və Jurnalistika və İnkişaf Mərkəzi İctimai Birliyinin (İB) təşkilatçılığı ilə “Yol hərəkəti təhlükəsizliyinin təmin olunmasında ictimai təşəbüsslərin gücləndirilməsi” mövzusunda tədbir keçirilib.

“Report”un xəbərinə görə, çıxış edən İB sədri Elməddin Muradlı deyib ki, yol-nəqliyyat hadisələrinin qarşısını almaq üçün maarifləndirmə işləri aparılmalıdır.

O xatırladıb ki, son günlər bir neçə ağır yol qəzası baş verib: “Bu halların aradan qaldırılması üçün birgə fəaliyyət göstərmək lazımdır. Ölkədə avtomobilləşmə prosesi sürətlənib. Bu proses sürətləndikcə problemlər də açıq görünür”.

Ekspert Ərşad Hüseynov qeyd edib ki, ölkə müasirləşsə də, yeni yollar yollar çəkilsə də, təfəkkür dəyişməyib: “Baş verən qəzaları, yol hadisələrini nəzərdən keçirdikdə elə qənaətə gəlinir ki, 1970-ci illərdir. Bu məsələlərdə yanaşma dəyişməlidir. Avtomobillərin sayı artıqdca qəzaların da sayı artır”.

Ə.Hüseynov vurğulayıb ki, sürücülərlə polis arasındakı münasibətlər tənzimlənməlidir: “Bunun üçün də proqram olmalıdır, maarifləndirmə işləri aparılmalıdır. Yəni, hər kəs hüququnu bilməlidir, buna uyğun davranılmalıdır”.

Milli Məclisin Hüquq siyasəti və dövlət quruculuğu komitəsinin üzvü Rafael Cəbrayılov çıxışında son illər baş verən yol qəzaları ilə bağlı statistikaya toxunub: “Yollarda baş verən qəzalara nəzər yetirdikdə adama elə gəlir ki, Azərbaycanın yollarında müharibə gedir. Azərbaycanın yollarında avtocəngəllik baş verir. Bunun qarşısı alınmalıdır”.

Deputat yol qəzalarının işıqlandırılmasında jurnalistləri diqqətli olmağa çağırıb: “Bu məsələlərlə bağlı jurnalistlərin də rolu mühümdür. Çünki informasiyasının çatdırılması çox əhəmiyyətlidir. Jurnalistlər qanunları da bilməlidir. Yazırlar ki, polis təqib edib, qəza baş verib. Jurnalist bilməlidir ki, qanuna edilən dəyişikliyə görə, artıq polis sürücünü təqib edə bilər. Qəza ilə bağlı adi xəbəri yazmağa nə var ki... Jurnalistlər daha çox analitik yazılar yazmalı, problemlərin aradan qaldırılmasına çalışmalıdır”.

Nazirlər Kabineti yanında Bakı Nəqliyyat Agentliyinin baş direktorunun müavini Mübariz Abbasov bildirib ki, təmsil etdiyi qurum yol qəzalarının qarşısının alınması üçün işlər görür: “2015-ci ilin ilk 6 ayında baş verən yol qəzaları 2016-cı ilin ilk 6 ayında baş verən yol qəzalarından iki dəfə çox olub. Biz bu istiqamətdə maarifləndirmə işləri aparırıq. İctimai təşkilatlar və digər qurumlar bu işdə birgə fəaliyyət göstərməlidir”.

Sonda xidmətdə fərqlənən yol polisi əməkdaşları mükafatlanıdırlıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi