Yuxarı

​Ədliyyə naziri Salyanda yerləşən cəzaçəkmə müəssisəsinə baş çəkib

Fikrət Məmmədov məhkumlarla görüşərək, onlara göstərilən tibbi yardımın yaxşılaşdırılması ilə bağlı tapşırıqlarını verib

Bakı. 16 fevral. REPORT.AZ/ Azərbaycanın ədliyyə naziri Fikrət Məmmədov Salyanda yerləşən cəzaçəkmə müəssisəsinə baş çəkib.

"Report"un nazirliyə istinadən verdiyi məlumata görə, F.Məmmədov məhkumlarla görüşərək onların saxlanma şəraiti, tibbi təminatı, islah prosesi, asudə vaxtlarının təşkili ilə maraqlanıb, istehsalat, idman sahələri, görüş otaqları, tibb məntəqəsi ilə tanış olub. Nazir infrastrukturun abadlaşdırılması, islah işinin səmərəli təşkili, məhkumlara göstərilən tibbi yardımın yaxşılaşdırılması, vaxtından əvvəl şərti azad etmə institutundan səmərəli istifadə olunması ilə bağlı tapşırıqlarını verib.

Bununla əlaqədar Ədliyyə Nazirliyinin məsul əməkdaşlarından, eləcə də geniş ictimaiyyətin nümayəndələri və hüquq müdafiəçilərindən ibarət formalaşdırılmış xüsusi Komissiyanın Salyanda yerləşən cəzaçəkmə müəssisəsində məhkumlarla növbəti görüşü olub. Əlliyə yaxın məhkumun şəxsi işi və digər aidiyyəti sənədlər hərtərəfli araşdırılıb, onlarla fərdi qaydada səmimi söhbətlər aparılıb, islah yoluna düşmüş məhkumları şərti azad etmə və ya daha yüngül rejimli müəssisəyə keçirmə ilə bağlı məhkəmə qarşısında müvafiq vəsatətlər qaldırılıb.

Qeyd olunmalıdır ki, iki ilə yaxın fəaliyyəti dövründə Komissiya tərəfindən mütəmadi olaraq müxtəlif cəzaçəkmə müəssisələrinə baş çəkilərək məhkumlarla fərdi görüşlər keçirilib, tərbiyəvi tədbirlər, maarifləndirmə və izahat işləri aparılıb, həqiqi islah yoluna düşmüş və əhalinin bütün təbəqələrini əhatə edən 2300-ə yaxın məhkum şərti azad olunmağa və ya yüngül rejimli müəssisəyə keçirilməyə layiq bilinib. Məhkəmələr tərəfindən baxılmış həmin işlərdən 95 faizi müsbət həll edilib.

Komissiyanın fəaliyyətində şəffaflıq maksimum təmin olunaraq artıq onun iclaslarına ictimai iştirakçılığın ən geniş formatlarından istifadə etməklə məhkumların valideynlərinin və yaxınlarının dəvət olunması təcrübəsi tətbiq edilir. İclaslara hətta zərərçəkmiş şəxslər də dəvət edilirlər ki, bu da münaqişəli vəziyyətin aradan qaldırılmasına və barışığa nail olunmasına öz töhfəsini verir.

Təsadüfi deyil ki, Komissiyanın şəffaf və obyektiv fəaliyyətinin, apardığı tərbiyəvi işin və həqiqi islah edilən məhkumların azad olunmağa tövsiyə etməsinin nəticəsidir ki, həmin şəxslər arasında residiv cinayətlərin sayı kəskin azalıb.

Məhkumlar şəffaflıqla seçilən və korrupsiya hallarının qarşısını alan bu müsbət təcrübənin səmərəli tətbiqindən məmnunluğunu bildirib, islah olunan məhkumların sosial adaptasiyasına yaxından kömək edən Ədliyyə Nazirliyinin bu təşəbbüsünü, onların saxlanma şəraitinin diqqət mərkəzində olmasını yüksək qiymətləndiriblər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi