Yuxarı

​Ədliyyə naziri Almaniya Beynəlxalq Hüquq Əməkdaşlığı Fondunun icraçı direktoru ilə görüşüb

Görüşdə Almaniyanın Azərbaycandakı səfiri xanım Haydrun Tempel iştirak edib

Bakı. 29 aprel. REPORT.AZ/ Ədliyyə naziri, Məhkəmə-Hüquq Şurasının sədri Fikrət Məmmədov Almaniya Beynəlxalq Hüquq Əməkdaşlığı Fondunun (İRZ) icraçı direktoru Dirk Mirovun başçılıq etdiyi nümayəndə heyəti ilə görüşüb.

Nazirlikdən "Report"a verilən məlumata görə, Almaniya və Azərbaycan arasında müxtəlif istiqamətlərdə, o cümlədən hüquqi sahədə səmərəli əməkdaşlığı qeyd edən nazir iki ölkənin Ədliyyə nazirlikləri arasında imzalanmış Birgə Bəyanatın implementasiyası çərçivəsində İRZ-nin fəal iştirakını və həyata keçirilən tədbirlərdə dəstəyini qeyd edib.

Nazir Prezidenti İlham Əliyevin rəhbərliyi ilə aparılan genişmiqyaslı məhkəmə islahatlarını, hakimlərin örnək kimi dəyərləndirilən ən şəffaf seçimini və tədrisini qeyd edib, ədliyyə, o cümlədən penitensiar sistemin inkişafı, məhkumların hüquqlarının genişləndirilməsinə yönələn qanunvericiliyin təkmilləşdirilməsi, onların sosial adaptasiyası, bu məqsədlə müasir penitensiar infrastrukturun yaradılması, cəzadan vaxtından əvvəl şərti azad etmə, habelə xüsusi notariat institutunun geniş tətbiqi barədə məlumat verib.

Həmçinin dövlətin əsas prioritetlərindən olan korrupsiyaya qarşı mübarizə tədbirləri, şəffaf və elektron xidmətlərin tətbiqi, xüsusilə Azərbaycan brendi olan və ədliyyənin müxtəlif xidmətlər göstərdiyi "ASAN xidmət" mərkəzlərinin vətəndaş məmnunluğuna yönələn fəaliyyəti diqqətə çatdırılıb.

Almaniyanın Azərbaycanla sıx əməkdaşlığından məmnunluğunu ifadə edən qonaqlar İRZ ilə Ədliyyə Nazirliyi arasında səmərəli əməkdaşlığı yüksək qiymətləndirib, məhkəmə-hüquq sistemindəki islahatları maraqla qarşılayaraq ölkəmizin bu sahədə uğurlu yol keçdiyini vurğulayıb, əldə olunmuş nailiyyətləri təqdir ediblər. D.Mirov ədliyyə və məhkəmə sahəsində təcrübə mübadiləsinin əhəmiyyətini qeyd edərək əlaqələrin bundan sonra da uğurla davam etdirilməsinə hazır olduğunu söyləyib.

Görüşdə əməkdaşlığın gələcək perspektivləri, o cümlədən İnsan Hüquqları üzrə Avropa Məhkəməsinin presedentlərinin öyrənilməsi, tədris tədbirlərinin və təcrübi səfərlərin təşkili, elektron məhkəmənin, habelə probasiya xidmətinin tətbiqi və digər məsələlər üzrə faydalı fikir mübadiləsi aparılıb.

Görüşdə Almaniyanın Azərbaycandakı səfiri xanım Haydrun Tempel iştirak edib.

Qonaqlar nazirlikdə Ədliyyə tarixi muzeyi ilə tanış olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi