Yuxarı

Bu il Azərbaycanda işsiz vətəndaşlara 16 781 vakant iş yeri təqdim olunub

53 şəhər və rayonda əmək yarmarkaları keçirilib

Bakı. 17 noyabr. REPORT.AZ/ Azərbaycan Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Xidməti tərəfindən bu ilin ötən dövründə respublikanın 53 şəhər və rayonunda əmək yarmarkaları keçirilib. "Report" xəbər verir ki, bu barədə nazirliyin İctimaiyyətlə əlaqələr şöbəsinin yaydığı məlumatda bildirilib.

Yarmarkalarda işsiz və işaxtaran vətəndaşlara 1961 müəssisə tərəfindən 16 781 boş (vakant) iş yeri təqdim olunub. Bu aktiv məşğulluq tədbirləri nəticəsində 4 833 nəfər işsiz və işaxtaran vətəndaşa boş iş yerlərinə göndəriş verilib ki, onların 80%-i münasib iş yerləri ilə təmin olunub. Tədbirlər zamanı müasir əmək bazarının tələblərinə uyğun peşələr üzrə peşə hazırlığı kurslarına cəlb olunanların sayı 419 nəfər, haqqı ödənilən ictimai işlərə cəlb edilənlərin sayı isə 250 nəfər təşkil edib.

Ümumilikdə Dövlət Məşğulluq Xidməti tərəfindən cari ilin ötən dövründə 22 932 nəfər münasib işlə təmin edilib, 1297 nəfər haqqı ödənilən ictimai işlərə, 2982 nəfər isə peşə hazırlığı kurslarına cəlb olunub. Bundan başqa, 74 215 nəfər vətəndaşa, əsasən də orta ümumtəhsil məktəblərinin yuxarı sinif şagirdlərinə peşəyönümü məsləhətləri və əmək bazarında işəgötürənlərin bugünkü tələbləri haqqında geniş və ətraflı məlumatlar verilib.

Qeyd olunan dövrdə ƏƏSMN tərəfindən Odlar Yurdu Universitetində, Azərbaycan Texniki Universitetində (Azərbaycan Memarlıq və İnşaat Universitetinin tələbə və məzunlarının iştirakı ilə), Qafqaz Universitetində, Azərbaycan Dövlət Aqrar Universitetində, Sumqayıt Dövlət Universitetində, Gəncə Dövlət Texnologiya Universitetində, Lənkəran Dövlət Universitetində, Bakı Biznes Universitetində məzun və tələbələrin əmək bazarına inteqrasiyası məqsədilə aktiv məşğulluq tədbirləri təşkil olunub. “Karyerada ilk addım” devizi altında keçirilən həmin tədbirlərdə ümumilikdə 470 müəssisə üzrə 4089 boş (vakant) iş yeri çıxarılıb. İşəgötürənlərin nümayəndələrinin də iştirakının təmin olunduğu tədbirlərin nəticəsi olaraq 669 nəfər tələbə və məzuna boş iş yerlərinə göndəriş verilib. Həmçinin işəgötürənlər tərəfindən 2 824 nəfər məzun və tələbənin şəxsi məlumatları (CV) qəbul olunub, 182 nəfər peşə hazırlığı kurslarına cəlb olunmaq üçun qeydiyyata alınıb. Bununla yanaşı, ƏƏSMN və BMT İnkişaf Proqramının birgə icra etdiyi “Azərbaycanda İnnovasiyanın və Məşğulluğun İnkişafı” layihəsi üzrə Bakı, Sumqayıt və Gəncə şəhərlərində fəaliyyət göstərən SYSLAB Təlim Tədris Mərkəzlərində 376 nəfər işsiz və işaxtaran vətəndaşa innovativ metodlar əsasında iş axtarışı bacarıqları aşılanıb. Onlardan 305 nəfəri artıq özlərinə iş tapıblar.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi