Bakı. 29 sentyabr. REPORT.AZ/ Bu gün “Qadın və Uşaq Akademiyası” İctimai Birliyinin təqdimat mərasimi keçirilib.
"Report" xəbər verir ki, tədbirdə ictimai xadimlər, ziyalılar, mədəniyyət və media mənsubları, həmçinin ictimai birliyin üzvləri, aprel şəhidi Təbriz Musazadənin həyat yoldaşı Pərişan Musazadə, şairə Sevinc Çılğın, təhsil eksperti İlahə Fazilova, "Mental Akademik" Tədris Mərkəzinin rəhbəri Gülnaz Mehdiyeva, kiçik sahibkar Nərmin Veysəlova, "Daun" Mərkəzinin pedaqoqu Məryəm Həsənova, həkim Aynur Mustafayeva, ADA Universitetinin kuratoru Əliyeva Leyla və başqaları iştirak ediblər.
Birliyin təsisçisi, tanınmış jurnalist Sevinc Fədai “Qadın və Uşaq Akademiyası”nın yaradılmasının məqsəd və məramını açıqlayıb: "Birlik “Sevgi və bilgi ilə aydın cəmiyyətə doğru” devizi ilə fəaliyyət göstərəcək. Əsas məqsədimiz qadın və uşaqları maarifləndirmək, onların yanında olaraq öz güclərini, bacarıqlarını kəşf etməyə dəstək olmaq, üzləşdikləri çətinliklər nəticəsində aldıqları travmanı birlikdə dəf etmək, o zədələri övladlarına, gələcəyə ötürməməyə yardımçı olmaqdır. Birlik bu məqsədlə daha çox bölgələrdə yaşayan qadın və uşaqların köməyinə çatmağı nəzərdə tutur. Həmin qadınların addım-addım cəmiyyətə inteqrasiyasını görmək, özünə, ailəsinə, üzvü olduğu topluma fayda verərək özünəinam, özgüvən qazanması, qadın azadlığını sağlam şəkildə dərk etməsi bizim üçün ən böyük töhfə olacaq. Cəmiyyətimizdə, ailələrimizdə fiziki, psixoloji, mənəvi şiddətə “Yox” deyir, bu günün insanıyla - güclü, mübariz, sağlam düşüncəli, dünyagörüşlü, özünə dəyər verən qızıyla, anasıyla, oğuluyla, atasıyla əl-ələ verib gələcəyimiz üçün zədəsiz, yarasız, aydın, xoşbəxt uşaqlar yetişdirə biləcəyimizə ümid edirik. Bir toplumun qadını sağlam və xoşbəxtdirsə, o cəmiyyət xoşbəxtdir demək. Bu amalla yola çıxıb qadınlarımıza dəstək olan xanımlarımız, təşkilatlarımız var, amma bir vətəndaş olaraq, hər birimiz bu yolda əlimizdən gələni əsirgəməməliyik. Bu birliyi yaratmaqla çətin həyatı olan, çıxılmaz vəziyyətdə olan xanımlarımıza, uşaqlarımıza demək istəyirik ki, ümid həmişə var, çıxış yolu həmişə var, gedəcək qapı həmişə var və biz də o ümiddən, döyüləcək qapılardan biriyik. İnsanımıza dəyər verir və o dəyəri öz əməllərimizlə, işlərimizlə göstərmək istəyirik! Bir sözlə, qadın sevgisi, ümidi, gücü, bacarığı, inamı ilə yola çıxırıq, qadınlar üçün, uşaqlar üçün, cəmiyyətimiz, gələcəyimiz üçün!”.
Hüquq müdafiəçisi Sədaqət Paşayeva bildirib ki, bu sahədə yeni komandaya hər zaman ehtiyac var: "Bizim cəmiyyətimizdə qadın bərabərliyi anlayışı çox yanlış təqdim edilir. Bu sahədə maarifləndirməyə çox ehtiyac var. Qadın düşüncəsindən istifadə edə bilməyən cəmiyyət itirir".
Aprel şəhidinin həyat yoldaşı Pərişan Musazadə qeyd edib ki, güclü qadın olmaq üçün ilk öncə insan özünə bunu təlqin etməlidir: "Mən dəftərimin ilk səhifəsində yazmışam ki, "Mən güclü qadınam". Güclü qadın olmaq üçün buna çalışmaq lazımdır, hər kəs özündən başlamalıdır".
Həkim Aynur Mustafayeva təqdimat mərasiminin ilk addım olduğunu bildirib: "Növbəti addımda işin planı qurulacaq".
Tədbir qonaqların təbrikləri və təklifləri ilə davam edib.