Yuxarı

Azərbaycanda fərdi uçot sistemində 32 836 əcnəbi qeydiyyatdadır

Ötən ay 305 əcnəbi vətəndaşa fərdi şəxsi hesab açılıb

Bakı. 16 sentyabr. REPORT.AZ/ Ölkəmizin mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun fərdi uçot sistemində qeydiyyata alınması prosesi davam etdirilir.

Nazirliyin İctimaiyyətlə əlaqələr şöbəsindən "Report"a verilən məlumata görə, bu ilin avqust ayında əlavə olaraq 305 nəfər əcnəbi vətəndaşa fərdi şəxsi hesab açılıb. Sistemin əhatə etdiyi xarici ölkə vətəndaşlarının sayı bu ilin sentyabrın 1-nə olan statistikaya əsasən 32 836 nəfər təşkil edir. Bu da ötən ilin müvafiq dövrü ilə müqayisədə 25.5 faiz çoxdur. Sistemdə qeydiyyata alınmış əcnəbilərin 88.4 faizi kişilər, qalanları qadınlardır.

Fərdi şəxsi hesabı olan əcnəbilər ümumilikdə 120 ölkəni təmsil edirlər. Onların sırasında say çoxluğuna görə ilk yerləri Тürkiyə (15 257 nəfər), Gürcüstan (3 209 nəfər) Rusiya (1 880) vətəndaşları tuturlar.

Sistemdə Özbəkistan (1752 nəfər), Hindistan (1382 nəfər), İran (1032 nəfər), Çin (909 nəfər), Banqladeş (798 nəfər), Pakistan (690 nəfər), Birləşmiş Böyük Britaniya və Şimali İrlandiya (642 nəfər), Ukrayna (539 nəfər) , Türkmənistan (315 nəfər), Filippin (293 nəfər), ABŞ (283 nəfər), Almaniya (266 nəfər), Qazaxıstan (250 nəfər), İtaliya (213 nəfər) və s. ölkələrin vətəndaşları da qeydiyyatdadırlar.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi