Bakı. 24 fevral. REPORT.AZ/ Azərbaycanın avtomobil yollarında yol hərəkəti təhlükəsizliyinin təmin edilməsi qaydalarının pozulmasına görə tətbiq edilən cərimələrin əhatə dairəsi genişləndirilib.
"Report" xəbər verir ki, Milli Məclisin bugünkü plenar iclasında İnzibati Xətalar Məcəlləsinə (İXM) bununla bağlı əlavə və dəyişikliklər edilib.
Belə ki, İXM-in 164-cü maddəsinə (Avtomobil yollarında yol hərəkəti təhlükəsizliyinin təmin edilməsi qaydalarının pozulması) edilməsi nəzərdə tutulan əlavə və dəyişikliklərə görə, bundan sonra bir sıra xətalara görə də cərimələr tətbiq olunacaq. Maddəyə ediləcək əlavəyə görə, yolun hərəkət hissəsində və ya səkilərdə yol hərəkətinin təhlükəsizliyinə mane olan şərait yaradılmasına və yolların hərəkət hissəsində, habelə yolların, yol qurğularının tikintisi və təmiri ilə əlaqədar olmayan yüklərin yüklənməsinə və ya boşaldılmasına görə cərimələr nəzərdə tutulur.
Bundan sonra avtomobil yollarının torpaq sahələrində müvafiq işlərin həyata keçirilməsi üçün verilən razılığın şərtlərinə əməl etməyənlər də cərimələnəcək. Habelə avtomobil yollarında nəqliyyat vasitələrinin və piyadaların hərəkətinə maneə yaradanlara qarşı da cərimə tətbiq olunacaq.
Avtomobil yollarında "Yol hərəkəti haqqında" qanunun tələblərinə uyğun olmayan yol nişanlarının yerləşdirilməsi, həmçinin "Avtomobil yolları haqqında" qanunla müəyyən olunmuş qaydalar pozulmaqla, reklam və digər məlumat qurğularının yerləşdirilməsi qadağan edilir. Bu qaydaları pozanlar cərimələnəcəklər.
Həmin maddəyə edilən digər əlavəyə görə, təhkim zolağında avtomobil yollarının tikintisi, saxlanılması, təmiri və yenidən qurulması ilə bağlı olmayan işlər görən, eləcə də yol hərəkətinin təhlükəsizliyi, sərnişin və yük daşımaları sahəsində nəzarəti həyata keçirən müvafiq icra hakimiyyəti orqanının xidməti tikililəri və qurğuları istisna olmaqla, avtomobil yollarının tikintisi, saxlanılması, təmiri, yenidən qurulması üçün nəzərdə tutulmayan bina və qurğular yerləşdirənlər cəzalandırılacaqlar.
Həmçinin, tırtıllı, uzun ölçülü, iri qabaritli, ağır çəkili və ya təhlükəli yükləri daşıyan nəqliyyat vasitələrinin hərəkəti zamanı avtomobil yoluna və yol qurğularına zərər dəyməsinə, yol örtüyünün və yolun mühəndisi konstruksiyasının zədələnməsinə, avtomobil yoluna və yolda yerləşdirilən qurğulara müdaxilə edilməsinə görə də cərimələr tətbiq ediləcək.
Yuxarıda qeyd edilən xətalara yol verən fiziki şəxslər 80 manatdan 100 manatadək miqdarda, vəzifəli şəxslər 400 manatdan 500 manatadək miqdarda, hüquqi şəxslər isə 3000 manatdan 4000 manatadək cərimə olunacaqlar.
Qeyd edək ki, müzakirələrdən sonra mövcud dəyişiklik və əlavəlar qəbul edilib.