Yuxarı

Prezident İlham Əliyev Ramzan Kadırovu qəbul edib - ƏLAVƏ OLUNUB

Prezident İlham Əliyev Ramzan Kadırovu qəbul edib - ƏLAVƏ OLUNUB

Bakı. 27 noyabr. REPORT.AZ/ Azərbaycan Respublikasının Prezidenti İlham Əliyev noyabrın 27-də Rusiya Federasiyası Çeçenistan Respublikasının başçısı Ramzan Kadırovun rəhbərlik etdiyi nümayəndə heyətini qəbul edib.

“Report” xəbər verir ki, Azərbaycan və çeçen xalqları arasında tarixən dostluq əlaqələrinin mövcud olduğunu vurğulayan dövlətimizin başçısı əməkdaşlığın bu gün yeni bir mərhələyə yüksəldiyini deyib.

Prezident İlham Əliyev Ramzan Kadırova və bütün dost çeçen xalqına sosial-iqtisadi sahədə əldə edilmiş böyük nailiyyətlər münasibətilə təbriklərini çatdırdı və bütün bu uğurların qazanılmasında Ramzan Kadırovun xüsusi rolunu qeyd edib. Eyni zamanda, dövlət başçısı Rusiya Federasiyası Çeçenistan Respublikasında sabitliyin və əmin-amanlığın bərqərar olunmasının önəmini də vurğulayıb.

Prezident İlham Əliyev Azərbaycan Respublikası ilə Rusiya Federasiyası arasında strateji tərəfdaşlığa əsaslanan ikitərəfli münasibətlərin bütün sahələrdə uğurla inkişaf etdiyini bildirərək, bu işdə iki ölkənin dövlət başçılarının mütəmadi qarşılıqlı səfərlərinin rolunu xüsusi qeyd edib. Azərbaycanla Rusiya arasında yüksək səviyyədə daimi etimadın və qarşılıqlı fəaliyyətin mövcud olduğunu bildirən Prezident İlham Əliyev Rusiya Prezidenti Vladimir Putinin Azərbaycana səfəri zamanı keçirilən Regionlararası Forumun əhəmiyyətini qeyd edib. Dövlət başçısı Azərbaycan Respublikası ilə Rusiya Federasiyasının Şimali Qafqaz respublikaları, o cümlədən Çeçenistan Respublikası ilə əməkdaşlığın iki ölkə arasında əlaqələrin möhkəmlənməsi işinə töhfə verdiyini bildirib. Prezident İlham Əliyev Ramzan Kadırovun rəhbərlik etdiyi nümayəndə heyətinin Azərbaycana səfərinin Azərbaycan-Rusiya ikitərəfli münasibətlərinin və Çeçenistan Respublikası ilə əməkdaşlığın daha da genişlənməsinə xidmət edəcəyinə əminliyini bildirib.

Xoş sözlərə görə minnətdarlığını bildirən Çeçenistan Respublikasının başçısı Ramzan Kadırov Prezident İlham Əliyevin rəhbərliyi ilə Azərbaycanda böyük inkişafa nail olunduğunu, dini icmalar, o cümlədən müsəlmanlar arasında həmrəyliyin möhkəmləndirilməsi istiqamətində böyük işlərin görüldüyünü qeyd edib. Xalqlarımız arasında dostluq və qardaşlıq əlaqələrinin mövcud olduğunu deyən Ramzan Kadırov Azərbaycan xalqının ümummilli lideri Heydər Əliyevin çeçen xalqına göstərdiyi köməyin hər zaman böyük minnətdarlıq hissi ilə yad edildiyini deyib. O qeyd edib ki, Azərbaycan xalqının ümummilli lideri Heydər Əliyevin xatirəsini Çeçenistan Respublikasında əbədiləşdirmək üçün Ulu Öndərin adını daşıyacaq parkın açılması planlaşdırılır və Prezident İlham Əliyevin bu parkın açılış mərasimində iştirakı Çeçenistan Respublikasında səbirsizliklə gözlənilir.

Dövlət başçısı Çeçenistan Respublikasına səfərə dəvəti minnətdarlıq hissi ilə qəbul edib. Ulu öndər Heydər Əliyevin xatirəsinə göstərilən hörmətə görə minnətdarlığını bildirən Prezident İlham Əliyev öz tərəfindən Azərbaycanda Hacı Əhməd Kadırovun xatirəsinin dərin hörmətlə yad edildiyini bildirdi və ən çətin illərdə çeçen xalqının sınaqdan çıxmasında onun xüsusi rolunu qeyd edib.

Azərbaycan Respublikasının Prezidenti İlham Əliyevin adından Rusiya Federasiyası Çeçenistan Respublikasının başçısı Ramzan Kadırovun şərəfinə nahar verilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi