Yuxarı
    Bağlamaq

    Azərbaycanla Litva arasında regional və beynəlxalq məsələlər ətrafında fikir mübadiləsi aparılıb

    Elmar Məmmədyarov Litva parlamentinin sədr müavini ilə görüşüb

    Bakı. 24 aprel. REPORT.AZ/ Azərbaycanın xarici işlər naziri Elmar Məmmədyarov Litvaya rəsmi səfəri çərçivəsində bu ölkə Seyminin (parlament) sədr müavini Gediminas Kirkilas, Xarici Əlaqələr üzrə Komitəsinin sədri Yuozas Bernatonis və Azərbaycan Respublikası ilə Parlamentlərarası Əlaqələr üzrə Qrupun rəhbəri Valeriyus Simulik və qrupun digər üzvləri ilə geniş tərkibdə görüş keçirib.

    Azərbaycan XİN-dən "Report"a verilən məlumata görə, görüşdə Azərbaycan və Litva arasında diplomatik münasibətlərin 1918-ci ildə yaradıldığı vurğulanaraq Azərbaycan Demokratik Cümhuriyyətində Litvanın Konsulluğunun fəalliyyət göstərdiyi və gələn il ölkələrimiz arasında diplomatik əlaqələrin yaradılmasının 100 illiyinin qeyd olunacağı diqqətə çatdırılıb. Bu əlamətdar hadisə çərçivəsində hər iki ölkənin parlamentləri və digər qurumları səviyyəsində yubiley xarakterli müxtəlif tədbirlərin keçirilməsinin vacibliyi qeyd olunub.

    Keçirilmiş görüşlər əsnasında Azərbaycan və Litva arasında dostluq münasibətlərinin müxtəlif sahələr üzrə inkişafından məmnunluq ifadə edilib və ikitərəfli əlaqələrin dərinləşdirilməsi baxımından qarşılıqlı səfərlərin həyata keçirilməsinin vacibliyi vurğulanıb. Həmçinin, iqtisadi-ticarət əlaqələrinin daha da inkişaf etdirilməsi üçün birgə səylərin artırılması vacibliyi önə çəkilib.

    Eyni zamanda parlamentlərarası diplomatiyanın əhəmiyyətinə toxunularaq bu xüsusda parlamentlərarası işçi qrupları səviyyəsində mütəmadi təmasların vacibliyi vurğulanıb. İkitərəfli formatla yanaşı, Azərbaycan və Litvanın beynəlxalq təşkilatlar çərçivəsində də uğurlu əməkdaşlığı qeyd olunub.

    Elmar Məmmədyarov Azərbaycanın Avropa İttifaqı ilə əlaqələri və hazırda Aİ ilə Azərbaycan arasında strateji tərəfdaşlığa dair saziş layihəsi üzərində aparılan danışıqlar barədə həmsöhbətlərə məlumat verib. Litvanın Azərbaycanın Aİ ilə əlaqələrinin inkişaf etdirilməsinə verdiyi dəstək təqdir olunub.

    Görüşdə həmçinin nəqliyyat dəhlizləri layihəsi, o cümlədən Şimal-Cənub layihəsinin əhəmiyyəti xüsusi qeyd edilərək, bu layihənin Hind okeanı hövzəsi ilə Baltik regionu arasında dəmir yol vasitəsilə uzlaşma yarada biləcəyi və nəticə etibarilə Litvanın şirkətlərinin də bundan faydalanacağı diqqətə çatdırılıb.

    Ermənistan-Azərbaycan Dağlıq Qarabağ münaqişəsinin həlli üzrə aparılan danışıqlar prosesinə toxunan nazir münaqişənin Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi çərçivəsində həlli edilməli olduğunu və BMT Təhlükəsizlik Şurasının müvafiq qətnamələrinin tələblərinə əsasən Ermənistan silahlı qüvvələrinin Azərbaycanın bütün işğal edilmiş ərazilərdən dərhal, qeyd-şərtsiz və tamamilə çıxarılmalı olduğunu diqqətə çatdırıb. O əlavə edib ki, güc tətbiq edərək dövlətlərin beynəlxalq səviyyədə tanınmış sərhədlərinin dəyişdirilməsi cəhdləri qəbuledilməzdir.

    Görüş əsnasında qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi