Yuxarı

Azərbaycan və Şimali Koreya xarici işlər nazirləri görüşüblər

Azərbaycan və Şimali Koreya xarici işlər nazirləri görüşüblər

Bakı. 6 aprel. REPORT.AZ/ Xarici işlər naziri Elmar Məmmədyarov Qoşulmama Hərəkatının Bakıda keçirilən aralıq nazirlər konfransı çərçivəsində Koreya Xalq Demokratik Respublikasının xarici işlər naziri Ri Yonq-ho ilə görüşüb. 

Xarici İşlər Nazirliyinin mətbuat xidmətindən "Report"a verilən məlumata görə, Ri Yonq-ho konfransın yüksək səviyyədə təşkilinə görə Azərbaycan hökumətinə təşəkkür edib. 

XİN başçısı 2019-cu ildən Azərbaycanın təşkilata sədrliyə başlamasının Qoşulmama Hərəkatına üzv dövlətlərin Azərbaycana olan inamından irəli gəldiyini bildirib. O, həmçinin KXDR-in Azərbaycanın sədrliyi dövründə üzv dövlətlərlə daha yaxından əməkdaşlıq etməkdə maraqlı olduğunu əlavə edib.

E.Məmmədyarov Ri Yonq-honun Azərbaycanda salamlamaqdan məmnun olduğunu bildirib. Azərbaycanın XİN başçısı Qoşulmama Hərəkatının məqsəd və prinsiplərinə, xüsusilə ərazi bütövlüyü, suverenliyi və siyasi müstəqilliyin dəstəklənməsinin cari beynəlxalq münasibətlərdə aktual olduğunu və Bandunq prinsiplərinə sadiqliyin vacib olduğunu diqqətə çatdırıb.

Səfərinin tarixi olduğunu bildirən Ri Yonq-ho ikitərəfli münasibətlərin genişləndirilməsi baxımından səfərlər mübadiləsinin arzuolunan olduğunu vurğulayıb. 

Ri Yonq-ho KXDR-in Azərbaycanla əməkdaşlığın genişləndirilməsində, xüsusilə neft sahəsində Azərbaycanın zəngin təcrübəsinin öyrənilməsində maraqlı olduğunu qeyd edib. O, həmçinin Bakı şəhərinin arxitekturasının öyrənilməsi məqsədi ilə KXDR-dən olan memarların səfərinin mümkünlüyünü vurğulayıb.

Görüşdə həmçinin qarşılıqlı maraq doğuran digər məsələlər ətrafında geniş fikir mübadiləsi aparılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi