Yuxarı

“ASAN Viza” sistemi ilə çoxdəfəlik elektron vizaların verilməsi barədə dəyişiklik qüvvəyə minib

Prezident qanunu imzalayıb

Bakı. 12 yanvar. REPORT.AZ/ Azərbaycanda “ASAN Viza” sistemi vasitəsilə çoxdəfəlik elektron vizalar veriləcək.

“Report”un xəbərinə görə, bu, Prezident İlham Əliyevin Miqrasiya Məcəlləsində dəyişiklik edilməsi barədə imzaladığı qanunda əksini tapıb.

Məcəllənin indiyədək qüvvədə olan 38-ci (Elektron vizalar) maddəsinin 1-ci bəndinə əsasən, Azərbaycana gələn əcnəbilər və vətəndaşlığı olmayan şəxslər “ASAN Viza” sistemi vasitəsilə elektron viza ala bilərlər. Elektron qaydada verilən birdəfəlik vizada ölkədə qalma müddəti 30 günədək müəyyən edilir. Bəndə edilən yeni əlavəyə əsasən, çoxdəfəlik vizada müddət 90 gün müəyyən edilib.

Bundan başqa, Prezident “Turizm haqqında” qanunda dəyişiklik edilməsi barədə qanunu da imzalayıb.

Dəyişikliyə əsasən, bundan sonra Azərbaycanda elektron vizanın sürətləndirilmiş qaydada alınması üçün edilən müraciətə ən geci 3 saat müddətində baxılacaq.

Qanunun 7-1-ci (Turizm vizası) maddəsinin 7-1.16-cı bəndinə əsasən, elektron vizanın verilməsi ilə bağlı müraciətə ən geci 3 iş günü müddətində baxılır, imtina üçün əsas olmadıqda viza rəsmiləşdirilərək müraciət etmiş şəxsin elektron poçt ünvanına göndərilir. Viza verilməsindən imtina edildikdə, müraciət etmiş şəxsin elektron poçt ünvanına bu barədə məlumat göndərilir. Bəndə edilən əlavəyə əsasən, elektron vizanın sürətləndirilmiş qaydada alınması üçün müraciət edildikdə ən geci 3 saat müddətində baxılacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi