Yuxarı

Səfir: "Yeni Aİ-Azərbaycan sazişi üzrə danışıqları yaxın gələcəkdə tamamlayacağımıza ümid edirik"

​Aİ səfiri: Yeni saziş üzrə danışıqları yaxın gələcəkdə tamamlanacaq
© Report/ Elshan Baba — Aİ-nın Azərbaycandakı nümayəndəliyinin rəhbəri Kestutis Yankauskas

"Avropa İttifaqı (Aİ) ilə Azərbaycan arasında yeni sazişə dair danışıqlar davam edir. Ümid edirik ki, nəticələr yaxın vaxtlarda əldə ediləcək. Avropa İttifaqı olaraq Avropa Komissiyasının indiki heyətinin işinin bitməsinə qədər bu sənədin razılaşdırılmasını tamamlamağa hazırıq".

"Report" xəbər verir ki, bunu Avropa İttifaqının Azərbaycandakı nümayəndəliyinin rəhbəri Kestutis Yankauskas deyib.

Səfir xatırladıb ki, Avropa İttifaqı Şurasının prezidenti Donald Tuskun bu həftə Azərbaycana səfəri zamanı bu məsələ də qaldırılıb: "Prezidentlər görüşün yekununda (yeni saziş üzrə - red.) danışıqlarda yaxşı irəliləyiş olduğunu qeyd ediblər və onların qısa zamanda yekunlaşdırılmasını dəstəklədiklərini açıqlayıblar".

"İşlər davam edir, qruplar işləyir və biz yaxın gələcəkdə nəticələr gözləyirik. Ancaq danışıqları nə vaxt tamamlayacağımızı dəqiq söyləmək çətindir", - Aİ səfiri jurnalistlərin yeni saziş üzrə danışıqların ilin sonuna qədər başa çatdırılıb-çatdırılmaması barədə sualını şərh edərkən bildirib.

Xatırladaq ki, Avropa Komissiyasının indiki heyəti işini payızda başa çatdıracaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi