Baş nazirin müavini Dünya Bankının Azərbaycan üzrə direktoru ilə görüşüb

Bakı. 26 aprel. REPORT.AZ/ Azərbaycanın baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov Dünya Bankının Azərbaycan üzrə ölkə direktoru Navid Hasan Naqvinin rəhbərlik etdiyi nümayəndə heyəti ilə görüşüb.

Bu barədə “Report”a Dövlət Komitəsinin mətbuat xidmətindən məlumat verilib.

Ə.Həsənov Azərbaycan hökuməti ilə Dünya Bankı arasındakı əməkdaşlığı yüksək qiymətləndirərək qeyd edib ki, indiyədək Dünya Bankının xətti ilə məcburi köçkünlərlə bağlı imzalanan kredit sazişlərinə uyğun olaraq müxtəlif növ infrastruktur layihələri, mikrokreditlərin verilməsi, gəlir imkanlarının dəstəklənməsi və digər komponentlər üzrə nəzərdə tutulan tədbirlər uğurla və şəffaf şəkildə həyata keçirilib.

Baş nazirin müavini qonağa Ermənistan-Azərbaycan, Dağlıq Qarabağ münaqişəsi nəticəsində doğma ocaqlarından didərgin düşmüş 1 milyon 200 mindən çox qaçqın və məcburi köçkünün sosial problemlərinin həlli istiqamətində görülən işlər barədə ətraflı məlumat verib və Azərbaycan hökumətinin Dünya Bankı ilə əməkdaşlıq etdiyi müddətdə kifayət qədər zəngin təcrübənin toplandığını, indiyədək həyata keçirilən layihələr zamanı heç bir anlaşılmazlığın olmadığını, missiya üzvlərinin ölkədə öz işlərinin öhdəsindən layiqincə gəldiyini diqqətə çatdırıb.

Xüsusilə Prezident İlham Əliyevin tapşırığına əsasən məcburi köçkünlərin sosial-məişət və məşğulluq problemlərinin həllinə istiqamətlənmiş səylərin gücləndirilməsi məqsədilə keçən ilin iyun ayında Azərbaycan hökuməti ilə Dünya Bankı arasında imzalanmış yeni kredit sazişinin müzakirə olunduğu görüşdə indiyədək görülən işlər təhlil edilib, qarşıda duran prioritet vəzifələr müəyyənləşdirilib.

Diqqətə çatdırılıb ki, layihə çərçivəsində respublikanın müxtəlif ərazilərində məskunlaşmış məcburi köçkünlər üçün tikilmiş uşaq bağçaları, məktəblər, icma mərkəzləri kimi sosial-infrastruktur obyektlərinin təmiri, içməli su, elektrik enerjisi ilə təchizatı, kəndlərarası və daxili yolların təmiri, sanitariya və irriqasiya sistemlərinin bərpası, habelə yeni salınmış qəsəbələrdə müxtəlif infrastruktur layihələrinin həyata keçirilməsi nəzərdə tutulub: "Bununla yanaşı, məcburi köçkünlərin gəlir imkanlarının artırılması və məşğulluğunun təmin olunması istiqamətində də məcburi köçkün icmalarına texniki və maliyyə dəstəyi göstəriləcək. Prezident İlham Əliyevin həyata keçirdiyi uğurlu siyasətin nəticəsidir ki, Azərbaycan hökuməti ilə Dünya Bankı arasındakı həyata keçirilən layihələr qarşılıqlı əməkdaşlıq şəraitində uğurla davam etdirilib. İstər məcburi köçkünlərin məskunlaşma obyektlərində, istərsə də onlar üçün yeni salınmış qəsəbələrdə həyata keçirilən layihələr ölkə üçün mühüm önəm kəsb edir".

Dünya Bankı tərəfindən həyata keçirilən bir çox layihələrdən danışan Navid Hasan Naqvi qeyd edib ki, bu layihələr içərisində ən çox diqqətçəkən kənd yerlərinin inkişafını dəstəkləyən və məcburi köçkünlərlə bağlı həyata keçirilən layihələrdir. O bildirib ki, rəhbərlik etdiyi nümayəndə heyəti həm Bakı ətrafı ərazilərdə, həm də regionlara səfər edərək layihə yerlərinə baş çəkərək orada həyata keçirilən işlərlə yerində tanış olacaqlar.

Ə.Həsənov Dünya Bankının nümayəndələrinin yeni layihə yerlərinə səfər etmələrini və həyata keçirilən işlərlə tanış olmalarını yüksək qiymətləndirib və bu səfərlərin tez tez olmasının vacibliyini vurğulayıb.

O bildirib ki, Azərbaycan dövləti vətəndaşlarının problemlərinin həllini öz üzərinə götürüb və ölkənin gündən-günə artan iqtisadi inkişafı bu problemlərin həllinə imkan yaradıb. Ancaq bununla yanaşı, Ermənistan-Azərbaycan, Dağlıq Qarabağ münaqişəsi nəticəsində doğma ocaqlarından didərgin salınmış 1 milyon 200 mindən çox qaçqın və məcburi köçkün üçün prioritet sahələrdən olan, xüsusilə gəlir gətirmə, infrastruktur, gənclərin dəstəklənməsi, mikrokredit proqramları üzrə həyata keçirilən layihələrə üstünlük verilməsi zərurəti qalmaqdadır.

Bu gün Azərbaycanın sürətlə inkişaf edərək dünyanın nüfuzlu ölkələrindən birinə çevrildiyini, dünyəvi problemlərin həllinə yönəlmiş mühüm tədbirlərə ev sahibliyi etdiyini, dünya dövlətləri ilə, beynəlxalq maliyyə qurumları ilə qarşılıqlı əməkdaşlığa xüsusi önəm verdiyini diqqətə çatdıran baş nazirin müavini deyib ki,bütün bu qazanılmış uğurlar Prezidentin həyata keçirdiyi məqsədyönlü siyasətin nəticəsində əldə olunub. Bu yaxınlarda ölkədə keçiriləcək 4-cü İslam Həmrəyliyi Oyunları və Formula 1 yarışları isə ölkəmizin artan nüfzunu bütün dünyaya bir daha nümayiş etdirəcək.

Dünya Bankı ilə əməkdaşlığa bu cür önəm verdiyinə, hərtərəfli məlumata görə minnətdarlığını ifadə edən Navid Hasan Naqvi Azərbaycan dövlətinin qaçqın və məcburi köçkünlərin problemlərinin həlli istiqamətində gördüyü işləri yüksək qiymətləndirib. O qeyd edib ki, təmsil etdiyi qurum da Azərbaycan hökuməti ilə əməkdaşlıqda, məcburi köçkünlərlə işləməkdə maraqlıdır. O, fəaliyyəti dövründə Dünya Bankı ilə Azərbaycan hökuməti arasında əməkdaşlığın daha da inkişafı üçün səylərini əsirgəmədiyini qeyd edib və bu istiqamətdə nəzərdə tutulan layihələrin vaxtında və keyfiyyətlə yerinə yetiriləcəyinə əminliyini bildirib. Navid Hasan Naqvi eyni zamanda istər paytaxt Bakının, istərsə də regionların sürətlə inkişaf etdiyini, ölkəmizin sülhün, tolerantlığın və həmrəyliyin mövcud olduğu bir məkana çevrilməsinin onda xoş təəssürat yaratdığını qeyd edib.

Görüşdə Navid Hasan Naqvinin məcburi köçkünlərin məskunlaşdığı yataqxanaların istismarı ilə bağlı fikirlərinə toxunan Ə.Həsənov diqqətə çatdırıb ki, ölkənin Birinci vitse-prezidenti Mehriban xanım Əliyeva ilk müşavirəsini qaçqın və məcburi köçkünlərin problemlərinə həsr etdi. Artıq Prezidentin və Birinci vitse-prezidentin tapşırığı ilə qəzalı vəziyyətdə olan yataqxanalarda və digər obyektlərdə yaşayan məcburi köçkünlərin köçürülməsi ilə bağlı müvafiq işlər görülməkdədir.