Azərbaycanda pərakəndə ticarət dövriyyəsi I rübdə 10% artıb

Bakı. 16 aprel. REPORT.AZ/ Cari ilin yanvar-mart aylarında Azərbaycanda istehlak məqsədilə pərakəndə ticarət subyektlərində istehlakçılara 5,8 mlrd. manatlıq və ya 2014-cü ilin müvafiq dövrü ilə müqayisədə 9,6% çox əmtəə satılıb.

“Report” Dövlət Statistika Komitəsinin məlumatına əsasən xəbər verir ki, satılmış istehlak mallarının 50,2%-ni ərzaq məhsulları, içki və tütün məmulatları, 49,8%-ni qeyri-ərzaq malları təşkil edib və qeyri-ərzaq mallarının xüsusi çəkisi 2014-cü ilin yanvar-mart ayları ilə müqayisədə 2,9 faiz bəndi artıb.

Bu ilin ilk üç ayında elektron pərakəndə ticarət dövriyyəsinin həcmi əvvəlki ilin yanvar-mart aylarına nisbətən 1,7 dəfə artaraq 2,72 mln. manat təşkil edib. Əhali onlayn rejimində sifariş verdiyi istehlak mallarının 92,7%-ni hüquqi şəxslərin, 7,3%-ni fərdi sahibkarların elektron ticarət şəbəkəsindən alıb. Elektron ticarət dövriyyəsinin 96,3%-ni qeyri-ərzaq malları təşkil edib.

Bu ilin ilk rübündə ictimai iaşə xidmətlərinin həcmi əvvəlki ilin eyni dövrü ilə müqayisədə 14,4% artaraq 219,9 mln. manat olub. Hüquqi şəxslər üzrə iaşə xidmətlərinin həcmi 93,6 mln. manat, bu sahədə fəaliyyət göstərən fərdi sahibkarların subyektləri üzrə isə 126,3 mln. manat təşkil edib.