Yuxarı

​Tibb Universitetində yeni əczaçılıq laboratoriyası açılıb

Burada substansiya, xammal, dərmanların istehsalı və satışında keyfiyyəti yoxlanılacaq

Bakı. 19 noyabr. REPORT.AZ/ Bu gün akademik Əhliman Əmiraslanov ATU-nun əczaçılıq fakültəsinin binasında yeni yaradılan müasir elmi tədqiqat laboratoriyasına baxış keçirib. ATU-dan "Report"a verilən xəbərə görə, o, laboratoriyada istifadəyə veriləcək avadanlıqlar üçün hazırlanmış şəraitlə tanış olub, öz tövsiyələrini verib.

ATU-nun əczaçılıq fakültəsinin dekanı Tahir Süleymanovun verdiyi məlumata görə, müasir avadanlıqlar "Respublikanın təbii sərvətləri əsasında yeni dərman vasitələrinin hazırlanması üçün Əczaçılıq üzrə müasir elmi tədqiqat laboratoriyasının təşkili" üzrə layihəsi çərçivəsində əldə edilib. Layihə Azərbaycan Prezidenti yanında Elmin İnkişafı Fondu tərəfindən dəstəklənib. Layihənin əsas məqsədi respublikanın təbii sərvətlərindən istifadə etməklə yeni dərman preparatlarının yaradılması üçün müvafiq əczaçılıq laboratoriyasının yaradılmasıdır.

Layihə bir neçə mərhələdə icra olunacaq və onlara müvafiq olaraq laboratoriyada ayrı-ayrı şöbələr qurulacaq. İlkin mərhələdə bioloji fəal maddələrin əldə edilməsi üzrə şöbə yaradılacaq. Bu fitokimyəvi şöbədə bitki, heyvan xammallarından bioloji fəal maddələrin alınması üçün istifadə ediləcək. İkinci - əczaçılıq texnologiyası şöbəsində isə fitokimyəvi laboratoriyada əldə edilmiş bioloji maddə əsasında müxtəlif dərman preparatlarının hazırlanması üçün istifadə olunacaq. Bura müxtəlif dərman formullarını hazırlamaq üçün avadanlıqlarla təmin ediləcək. Məsələn, burada həb düzəltmək üçün press, kapsulyator, nanoemulsiya avandanlığı və digər köməkçi – quruducu, nəmləndirici və s. avadanlıqlar olacaq. Üçüncü standartlaşma şöbəsində isə bioloji fəal maddələrin, substansiyaların və dərman formasına salınmış məhsulların keyfiyyətinə nəzarət üsulları hazırlanacaq. Burada həm substansiya, həm xammalların, həm dərmanların istehsalı və satışında keyfiyyəti müasir formada, ən yüksək səviyyəli avadanlıqla yoxlanılacaq. Bu şöbədə maye xronoqraf, qaz xronoqrafı, infraqırmızı spektr cihazı və digər köməkçi avadanlıqlar olacaq.

Ümumilikdə, əczaçılıq fakültəsinin laboratoriyalarına elmi tədqiqatları aparmaq üçün təxminən 30-a qədər müasir avadanlıq alınıb və onlar qısa müddətdə quraşdırılaraq istifadəyə veriləcək. Qeyd edək ki, alınan ən son model cihazların 90 faizi Azərbaycanda digər müəssisələrdə olmayan avadanlıqlardır.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi