Bakı. 28 fevral. REPORT.AZ/ "Bu günə qədər Milli Məclis səviyyəsində Reproduktiv Sağlamlıqla bağlı müxtəlif tədbirlər keçirilsə də bəzi deputatlar onun fəlsəfəsini, mahiyyətini ya bilmirlər, ya bilmək istəmirlər, ya da qəbul etmirlər".
"Report" xəbər verir ki, bunu "2017-2025-ci illər üzrə Azərbaycan Respublikası əhalisinin Reproduktiv Sağlamlığına dair Milli Strategiyanın" ilkin layihəsinin müzakirəsinə həsr olunan işçi görüşdə deputat Məlahət İbrahimqızı deyib.
O bildirib ki, Milli Məclis patriarx gücü olan parlamentdir: "Parlamentdəki 125 millət vəkilinin 20%-ə qədəri qadınlardır. Yəni böyük qismi kişilər təşkil edir".
M.İbrahimqızının sözlərinə görə, reproduktiv sağlamlıq bəzən milli dəyərlərə zidd anlayış kimi qəbul olunur: "Bununla da qanun layihəsinin ikinci oxunuşdan qəbul olunmasına problemlər yaradırlar. Etirazların, qanun layihəsinin əleyhinə çıxılmasının əsas məqsədi nədir? Ancaq "surroqat ana" başa düşülür. Azərbaycana belə bir qanun lazımdır. Düzdür əvvəllər olduğu kimi deyil, amma hələ də bu qanun layihəsin ikinci oxunuşdan sonra təsdiqlənməsi üçün ciddi probelmlərimiz var".
Deputat deyib ki, qanun layihəsinin qəbul olunmasına maneə yaradanlardan biri də ginekoloqlardır: "Qanun layihəsi müzakirə başlayandan surroqat ana məsələsinin layihədə olmasının vacibliyi vurğulandı. Azərbaycanda nə qədər din dövlətdən ayrı olsa da, konservativ fikirli insanlar, xüsusilə deputatlar bu məsələyə müqavimət göstərdilər".
O əlavə edib ki, məsələ ilə bağlı digər opponentlər maliyyə qurumlarıdır: "Bu layihənin önəmini Maliyyə Nazirliyinə sübut etməliyik. Çünki, Maliyyə Nazirliyinə dəstəyi olmadan bu məsələ kağız üzərində qalacaq".