BMT: Qərbi Afrikada Ebola virusuna yoluxan 10 mindən artıq insan sağalıb

Bakı. 14 yanvar. REPORT.AZ/ Qərbi Afrika ölkələrində ölümcül Ebola virusuna yoluxan 10 mindən artıq insan müalicə olunaraq tamamilə sağalıb.

"Report"un TASS agentliyinə istinadən verdiyi xəbərə görə, bu məlumatı BMT-nin baş katibi Pan Gi Mun Ebola virusu ilə mübarizəyə həsr olunmuş yığıncaqda səsləndirib.

Onun sözlərinə görə, dünya ictimaiyyəti vurusa yoluxan insanlara dəstək olmalıdır.

"Ötən ilin sonu etibarı ilə Qvineya və Sierra-Leonedə yeni yoluxma faktları aşkarlanmayıb. Liberiyada da oxşar vəziyyət müşahidə olunmaqdadır. Bu çox sevindirici haldır. Ancaq biz yenə də ayıq-sayıq olmalıyıq", - deyə baş katib vurğulayıb.

Xatırladaq ki, Ümumdünya Səhiyyə Təşkilatının (ÜST) yaydığı məlumatlara görə, Qərbi Afrikanın üç ölkəsində Ebola virusundan 11 207 nəfər ölüb.