Baş həkim: “Soyuq aylarda uşaqlar arasında daha çox pnevmoniya xəstəliyinə rast gəlinir”

Bakı. 2 noyabr. REPORT.AZ/ “Payız və qış mövsümündə havaların qeyri-sabit keçməsi kəskin respirator xəstəliklərin artmasına səbəb olur”.

"Report" xəbər verir ki, bunu Ə.F.Qarayev adına 2 saylı Klinik Uşaq Xəstəxanasının baş həkimi Azər Xudiyev deyib.

O qeyd edib ki, bu tip xəstəliklərin müalicəsinin vaxtında aparılmaması bronxit və pnevmoniya ilə (sətəlcəm) nəticələnir. 

A.Xudiyevin sözlərinə görə, soyuq aylarda uşaqlarda daha çox pnevmoniya xəstəliyinə rast gəlinir: “Ümumilikdə valideynlər övladlarının sağlamlığına, immunitetlərinin artırılmasına diqqət etməli, eləcə də xəstə olan zaman uşaqları ümumi kollektivlərə buraxmamalı, qoruyucu maskalardan istifadə etməlidirlər”.

Yolxucu xəstəliklərə gəlincə, baş həkim vurğulayıb ki, payız-qış mövsümündə uşaqlar arasında mədə-bağırsaq infeksiyalarına yoluxma halları da müşahidə olunur: "Belə xəstələrdə ishal və qusma olur. Xəstəliklərin ağırlaşmasının qarşısını almaq üçün ilk növbədə valideynlər ərazi poliklinikasına və sahə pediatrına müraciət edilməlidir. Kimyəvi tərkibli dərman preparatlarına üstünlük verilməsi məsləhət deyil”.