Yuxarı

​Türkiyənin "İncirlik" hərbi bazası ətrafında xüsusi əməliyyat keçirilib - FOTO

Avtomobillərlə əraziyə gətirilən yeddi minə yaxın silahlı polis hərbi bazanın giriş-çıxışını bağlayıb

Bakı. 31 iyul. REPORT.AZ/ Türkiyənin Adana vilayətindəki "İncirlik" hərbi bazası ətrafında xüsusi əməliyyat keçirilib. 

"Report" "Haber7.com"a istinadən xəbər verir ki, vilayətin bütün polis heyəti yarım saat ərzində hazırlıq vəziyyətinə gətirilib.

Məlumata görə, avtomobillərlə əraziyə gətirilən yeddi minə yaxın silahlı asayiş keşikçisi hərbi bazanın giriş-çıxışını bağlayıb. Habelə digər ərazilərə nəzarəti gücləndirib.

Türkiyənin digər  mətbu orqanları bunun ölkədə ikinci dəfə dövlət çevrilişinə cəhdlə bağlı ola biləcəyi ehtimalını irəli sürüb.

Lakin Türkiyənin Avropa İttifaqı məsələləri üzrə naziri Ömər Çelik bütün bunları təkzib edib. Nazirin sözlərinə görə, hərbi baza ətrafında baş verənlər "təhlükəsizliyinin standart yoxlanılması"ndan başqa bir şey deyil. "Hər şey qaydasındadır", - deyə Çelik hərbi bazanın girişi və çıxışının bağlanmasını şərh edərkən deyib.

Türkiyə mətbuatı Adanada polisin keçirdiyi əməliyyatın 2 saat yarım davam etdiyini vurğulayıb.

Xatırladaq ki, iyulun 15-dən 16-na keçən gecə Fətullah Gülənin tərəfdarları Türkiyədə hərbi yolla dövlət çevrilişinə cəhd edib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi